पृथ्वीनारायणको योगदानप्रति विवाद गर्नु आवश्यक छैनः उपप्रधानमन्त्री श्रेष्ठ

काठमाण्डौंः उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठले राष्ट्रनिर्माणमा पृथ्वीनारायण शाहबाट खेलिएको भूमिकाका बारेमा कसैले विवाद गर्नुपर्ने अवस्था नरहेको बताएका छन् ।

३०१औँ पृथ्वी जयन्तीका अवसरमा राष्ट्रिय प्रजातन्त्र पार्टी (राप्रपा) ले बुधबार आयोजना गरेको चियापानमा श्रेष्ठले राज्य विस्तारकै क्रममा वस्तुगत तहमा नेपालको भूभागको पुनः एकीकरण पृथ्वीनारायण शाहले गरेको उल्लेख गरे ।

उपप्रधानमन्त्री श्रेष्ठले भने, ‘पृथ्वीनारायणको योदानलाई सम्मान गर्दै सरकारले आजको दिनलाई बिदा दिने कार्यले ऐतिहासिक महत्त्व स्थापित भएको छ ।’