कांग्रेसको दोहोरो चाल

काठमाडौं : प्रतिनिधिसभामा प्रधानमन्त्री पुष्पकमल दाहाल ‘प्रचण्ड’लाई विश्वासको मत दिएको नेपाली कांग्रेसले सभामुख र उपसभामुखमा भने आफ्नै पार्टीको उम्मेद्वार उठाएपछि दोहोरो चाल चलेको आरोप लागेको छ । संघमा मात्रै नभएर प्रदेशमा समेत कुनै मुख्यमन्त्रीलाई विश्वासको मत दिने र कुनै प्रदेशमा विश्वासको मत नदिएपछि काँग्रेसलाई पार्टीभित्रैबाट दोहोरो भूमिका खेलेको आरोप लागेको छ । मूलतः नेपाली कांग्रेसका शेखर कोईराला  सभापति शेरबहादुर देउवाको भूमिकामाथि प्रश्न उठाउँदै संसदमा दोहोरो चरित्र देखाउन नहुने बताउँछन् ।

’कांग्रेसले अहिले दोहोरो चरित्र खेल्यो, प्रधानमन्त्री प्रचण्डलाई विश्वासको मत दिएर हामीले गल्ती गर्‍यौं । तटस्थ बस्ने प्रस्ताव मैले कार्यसम्पादन समितिको बैठकमा राखेको थिएँ । तर, त्यसको सुनुवाइ भएन,’ उनले भने, ’बहुमतको निर्णय मान्नुपर्ने बाध्यता पर्‍यो । विश्वासको मत दिन हुँदैनथ्यो’ नेता कोईरालाले भने । उनले पार्टी सभापति देउवाको कार्यशैली नबदलिइ कांग्रेसको भविष्य संकटमा पर्ने समेत स्पष्ट पारेका थिए । प्रधानमन्त्री प्रचण्डलाई विश्वासको मत दिन नहुने भन्दै महामन्त्रीद्वय विश्वप्रकाश शर्मा, गगन थापा, नेताहरू प्रकाशमान सिंह, अर्जुननरसिंह केसी, बलबहादुर केसी र प्रदीप पौडेल लगायतले फरक मत समेत राखेका थिए ।

तर, राष्ट्रपति आफूले पाउनुपर्ने बताउँदै आएको कांग्रेसले केन्द्रमा मात्रै होईन, प्रदेशमा समेत केही मुख्यमन्त्रीलाई समर्थन गरेको छ । कांग्रेसले मधेस र बागमती प्रदेशमा सरकारलाई विश्वासको मत दिएको छ भने एमालेले मुुख्यमन्त्री पाएका प्रदेश १, गण्डकी र लुम्बिनीमा भने विपक्षमा मतदान गरेको छ र्। कांग्रेसभित्र अहिले दोहोरो चरित्रमा देखिएकै हो, आफ्नो भूमिका समेत स्पष्ट गर्न नसक्दा सत्तापक्ष कि प्रतिपक्ष भन्नेमा कांग्रेसमै अन्यौल देखिन्छ,’ राजनीतिक विश्लेषक डा. विष्णु दाहालले भने । उनले पदका लागि कांग्रेस दरिलो प्रतिपक्षी भएर उभिन नसकेको पनि स्पष्ट पारेका छन् । तरपनि, देउवा निकट नेता वालकृष्ण खाँड भने कांग्रेसले आवश्यकताका आधारमा कतै समर्थन र विपक्षमा बसेको तरपनि, प्रतिपक्षीकै भूमिकामा रहने बताउँछन् ।

केन्द्रदेखि प्रदेशसम्म हामी प्रतिपक्षी भूमिकामा छौँ र रहनेछौँ । हामीले केन्द्रमा सरकारलाई विश्वासको मत लिने निर्णय गरेका थियौँ । प्रदेशको विषयमा प्रदेश संयन्त्रलाई नै आवश्यकताका आधारमा समर्थन, विश्वासको मतको विपक्षमा या उम्मेदवारे खडा गर्न भनेका थियौँ’ उनले भने । साथै उनले आवश्यकताका आधारमा कांग्रेसले भूमिका खेल्ने पनि बताएका छन् । यद्यपि, कांग्रेसभित्रबाटै सभापति देउवाको दोहोरो भूमिकाले असहजता भएको भन्दै आलोचना सुरु भएको छ । मध्यान्ह