प्रतिस्पर्धामार्फत शिक्षाको गुणस्तर उकास्न पहल लिन्छु : प्रधानमन्त्री दाहाल

काठमाण्डौं : प्रधानमन्त्री पुष्पकमल दाहाल प्रचण्डले आफूले विश्वविद्यालयलगायतका शिक्षाका सम्पूर्ण संरचनामा प्रतिस्पर्धा गराउन चाहेको भन्दै त्यसका लागि तयार रहन प्राज्ञहरूलाई आग्रह गरेका छन् ।

मंगलबार बिहान काठमाडौंमा आयोजित कान्तिपुर एजुकेसन समिटलाई सम्बोधन गर्दै प्रधानमन्त्री प्रचण्डले प्रतिस्पर्धामार्फत शिक्षाको गुणस्तर उकास्न आफूले पहल लिने बताएका हुन् ।

‘मैले घोषणा गरिसकेको छु- अब विश्वविद्यालयहरूमा राजनीतिक भागवण्डा हुने छैन ।

मेरिटोक्रेसीका आधारमा उपकुलपतिलगायतका पदाधिकारीहरू नियुक्त हुनेछन् । यसले योग्यले जिम्मेवारी प्राप्त गर्ने अवसरको ढोका खुल्नेछ,’ उनले भने, ‘विश्वविद्यालयका पदाधिकारीहरूले उच्च मनोबलका साथ आफ्नो विज्ञता प्रस्तुत गर्ने वातावरण मिल्नेछ, विद्यार्थी, अभिभावकलगायतमा उच्च शिक्षा र पदाधिकारीहरूप्रति भरोसा बढ्नेछ।’

शिक्षालगायत राष्ट्रिय जीवनका अधिकांश क्षेत्रमा भूमण्डलीकरणको प्रभाव परिरहेको उनले बताए । उनले शैक्षिक नीति, पाठ्यक्रम र संरचनामा परिवर्तन गरेर मात्र अहिलेका चुनौतीलाई छिचोल्न सकिने बताए । ‘पछिल्लो समय नयाँ पुस्तामा देशको शिक्षा गुणस्तरीय छैन, यसले विश्वबजारमा प्रतिस्पर्धा गर्न सक्दैन जस्तो नकारात्मक भाष्यको विकास हुँदै गएको र त्यसको प्रत्यक्ष प्रभाव बौद्धिक जनशक्तिको पलायनका रूपमा अभिव्यक्त भइरहेको सबैले देखेकै छौँ,’ उनले भने ।

रोजगारीका अवसर प्राप्त गरेकाहरू नै विदेश पलायन हुनु चिन्ताको विषय भएको प्रधानमन्त्री प्रचण्डले बताए ।