चाडपर्वलाई भड्किलो नबनाउन महासचिव पोखरेलको सुझाव

काठमाडौँ, १६ भदौ : नेकपा (एमाले) का महासचिव शङ्कर पोखरेलले चाडपर्वलाई भड्किलो नबनाउन सुझाव दिनुभएको छ ।

नेपाल बुद्धिजीवि परिषद् केन्द्रीय महिला विभागले आज यहाँ आयोजना गरेको ‘सामाजिक रुपान्तरणका लागि तीज’ कार्यक्रममा महासचिव पोखरेलले भन्नुभयो, “खर्च गर्ने कुरा आफैँमा नराम्रो होइन । तर के गर्दा अर्थतन्त्रको आधार विकास हुन्छ र के गर्दा अर्थतन्त्र कमजोर हुन्छ भन्ने कुरामा ध्यान दिनुपर्दछ ।” नेपालको मौलिक संस्कृतिको महत्वलाई बुझ्नुपर्ने उहाँको भनाइ थियो ।

महासचिव पोखरेलले तीज पर्वलाई संस्कृतिको माध्यमबाट जागरणको पर्व बनाउन सकिने बताउनुभयो । पर्वमा सही बिचारलाई सम्प्रेषण गर्न सकिए त्यसले समाज रुपान्तरणका लागि महत्वपूर्ण भूमिका निर्वाह गर्ने उहाँको भनाइ थियो ।

महासचिव पोखरेलले नेपाली संस्कृतिको जग भनेको नेपाली समाजको विविधताबीचको एकता भएको उल्लेख गर्नुभयो । कार्यक्रममा पार्टी स्थायी कमिटी सदस्य भानुभक्त ढकाल, सुजिता शाक्यलगायतको सहभागिता रहेको थियो । रासस