नेपाल वायु सेवा निगमका १४५ करार कर्मचारीको जागिर चट्

काठमाडौंः निजी क्षेत्रले संकटका बेला कर्मचारी निष्कासन गरेको समाचार सुनिराखिएकै हो । अरूमाथि भएको अन्यायबारे कलम चलाउने पत्रकार स्वयं आफैं सडकमा पुगेका छन् । थाहा छैन, यस्ता सिलसिला कहिलेसम्म चलिरहन्छन् ।

यही क्रममा सरकारी स्वामित्वका निकायले पनि धमाधम कर्मचारी निष्कासन गर्न थालेका छन् । यसको अग्रपंक्तिमा सरकारी राष्ट्रिय ध्वजावाहक नेपाल वायु सेवा निगम देखिएको छ ।  कोभिड-१९ का कारण असाधारण परिस्थिति उत्पन्न भएको भन्दै उसले करार सेवाका १ सय ४५ कर्मचारी निष्कासन गरेको  छ । साउनदेखि लागू हुनेगरी एनएसीले यस्तो निर्णय गरेको हो । निष्कासनमा पर्नेहरूमा वर्षौंदेखि कार्यरतसमेत छन् ।

निगमले बुधबार एक विज्ञप्ति जारी गर्दै कोभिड-१९ को  प्रभावले निगमको आन्तरिक तथा अन्तरराष्ट्रिय उडानमा प्रत्यस असर परी आर्थिक दायित्व बढेको तथा ऋण सहायताबाट खरिद गरेका जहाजको साँवा तथा ब्याज भुक्तानी गर्नसमेत नसक्ने अवस्था आएकाले तत्कालीन करारमा कार्यरत जनशक्तिलाई निरन्तरता दिन नसकिएको स्पष्ट पारेको छ ।

करार सेवाका कर्मचारीको सम्झौता नवीकरण नभएपछि उनीहरू आन्दोलित बनेका छन् । संकटका बेला करार नवीकरण नगर्ने निर्णय न्यायसंगत नभएकाले करेक्सन गर्नुपर्ने उनीहरूको भनाइ छ ।साँघुबाट