विधेयक पारित हुँदा शिक्षा क्षेत्रका धेरै समस्या हल हुन्छन् : राष्ट्रियसभा अध्यक्ष दाहाल

काठमाडौं । राष्ट्रियसभाका अध्यक्ष नारायणप्रसाद दाहालले विद्यालय शिक्षा विधेयक पारित भएपछि शिक्षा क्षेत्रमा देखिएका धेरै समस्याहरु समाधान हुने विश्वास व्यक्त गरेका छन्।

शनिबार ललितपुरमा आयोजित बृहत्त शैक्षिक सम्मान कार्यक्रममा अध्यक्ष दाहालले पञ्चायतकालीन ऐनबाट निर्देशित हुनुपर्दा परिवर्तित सन्दर्भका समस्या समाधान हुन नसकेको भन्दै विद्यालय शिक्षा विधेयक पारित भएपछि शिक्षा क्षेत्रमा देखिएका धेरै समस्याहरु समाधान हुने विश्वास व्यक्त गरेका हुन्।

जनताका सम्पूर्ण मौलिक हक अधिकार उपभोग गर्नका लागि सहज वातावरण बनाउन चाहिने कयौं ऐन कानुन बन्न नसको अवस्थामा संघीय संसदको चालू अधिवेशनबाट आवश्यक विधेयक पारित हुने उनले बताए।

उनले शैक्षिक क्षेत्रबाट उत्पादित दक्ष जनशक्तिले नै मुलुकको समग्र विकास र समृद्धिमा महत्वपूर्ण भूमिका खेल्ने भएकाले विद्यार्थीलाई गुणस्तरिय शिक्षा दिन उपयुक्त वातावरण निर्माण गर्नु सवैको दायित्व भएको धारणा राखे।

मुलकमा व्यवस्था परिवर्तन भए पनि महसुस हुने गरि जनताको जीवनस्तरमा रुपान्तरण हुन नसकेको अवस्थामा जनताले खोजेको खासमा शिक्षा, स्वास्थ्य, रोजगारी र आर्थिक समृद्धिका गम्भीर बन्नुपर्ने उनले बताए।

दाहालले जनतामा बढिरहेको निरासामाथि खेल्दै परिवर्तनविरोधी र पश्चगामी शक्तिहरुले फेरि टाउको उठाउने र संघीय लोकतान्त्रिक गणतान्त्रिक व्यवस्थामाथि नै धावा बोल्ने षड्यन्त्रप्रति पनि सवै सचेत हुनुपर्ने धारणा राखे।