बाँकेमा कोरोना संक्रमित महिलाको मृत्यु – कोरोनाबाट मृत्यु हुनेको संख्या ७६ पुग्यो

काठमाण्डौंः बाँकेमा एक जना कोरोना संक्रमित महिलाको मृत्यु भएको छ ।

बाँकेको कोहलपुर नगरपालिका वडा नम्बर – २ घर भएकी ७० वर्षीय कोरोना संक्रमित महिलाको नेपालगञ्ज मेडिकल कलेज कोहोलपुरमा उपचारको क्रममा आइतबार मृत्यु भएको हो ।

योँसगै नेपालमा कोरोनाबाट मृत्यु हुनेको संख्या ७६ पुगेको छ । बाँकेका प्रमुख जिल्ला अधिकारी रामबहादुर कुरुम्वाङ्गले निमोनियाका कारण शुक्रबार अस्पतालमा भर्ना भएकी महिलाको आज दिउँसो तीन बजे मृत्यु भएको जानकारी दिए । दुईदिन अघि उनमा कोरोना पुष्टि भएको थियो।

यसअघि मात्रै बाँकेमा कोरोना संक्रमणका कारण  दुई जनाको मृत्यु भइसकेको छ। नरैनापुर गाउँपालिकाका २५ वर्षीय युवक र बैजनाथ गाउँपालिकाकी एक महिलाको कोरोना संक्रमणका कारण मृत्यु भएको थियो।

आइतबार कोरोनाका कारण मृत्यु भएकी महिलासहित बाँकेमा मृतकको संख्या तीन पुगेको छ।