नेप्से परिसुचक दोहोरो अंकले घट्यो

काठमाण्डौंः कारोबार हुने साताको पहिलो दिन नेप्से परिसूचकमा दोहोरो अंकको गिरावट आएको छ ।

कारोबार हुने पछिल्ला ३ कारोबारदेखि लगातार घटिरहेको नेप्से आइतबार ११.०६ अंकले घटेर २६२९.८९ विन्दुमा झरेको छ। आजसेन्सेटिभ इण्डेक्स २.०५ अंक, फ्लोट इण्डेक्स ०.८० अंक र सेन्सेटिभ फ्लोट इण्डेक्स ०.७१ अंक घटेको छ।

गत बिहीबार ७ अर्ब ९७ करोडमा सीमित भएको कारोबार रकममा भने आइतबार वृद्धि भएको छ । आज ३१३ स्टकको ८६ हजार ६३६ पटकको कारोबारमा ९ अर्ब १३ करोड ७४ लाख १४ हजार रुपैयाँबराबरको १ करोड ९९ लाख ९२ हजार कित्ता शेयर खरिदबिक्री भएका छन् ।

रिभर फल्स पावर र पियोर इनर्जीको शेयर सकारात्मक सर्किट लेभलमा कारोबार भएको छ । चिलिमे हाइड्रोपावर कम्पनी र छ्याङ्दी हाइड्रोपावरको शेयरमूल्य ८ प्रतिशतले बढ्दा ओम मेगाश्री फर्मास्यूटिकल्सको शेयरमूल्यमा १० प्रतिशतको गिरावट आएको छ ।

कारोबार रकमका आधारमा शीर्ष स्थानमा रहेको राधी विद्युत कम्पनीको ७२ करोड ९५ लाख १४ हजार रुपैयाँबराबरको शेयर खरिदबिक्री भएको छ। युनिभर्सल पावर कम्पनीको ६२ करोड र ङादी ग्रुप पावरको साढे ६१ करोडभन्दा बढीको शेयर किनबेच भएको छ।

१३ उपसमूहमध्ये २ उपसमूहको परिसूचक बढेको छ भने ११ उपसमूहको परिसूचक घटेको छ। जलविद्युत उपसमूहको परिसूचक १ प्रतिशत बढीले र होटल तथा पर्यटन उपसमूहको परिसूचक सामान्य प्रतिशतले बढेको छ। बैंकिङ्ग उपसमूहको परिसूचक सबैभन्दा बढी १.०५ प्रतिशतले घटेको छ।