मुख्य सचेतक तथा प्रमुख सचेतकसँग छलफल गर्दै सभामुख

काठमाडौं, ०१ असार । सभामुख देवराज घिमिरेले संघीय संसद्को अवरुद्ध अवस्थालाई अन्त्य गर्न पहलस्वरूप प्रमुख दलका प्रमुख सचेतक तथा सचेतकहरूलाई छलफलका लागि बोलाएका छन्।

सभामुखका प्रेस सल्लाहकार शेखर अधिकारीका अनुसार आज (आइतबार) बिहान ९ बजे सिंहदरबारमा छलफलको बैठक तय गरिएको हो।

छलफलमा संसद्को हालको गतिरोध, बजेटमाथिको छलफल प्रभावित हुनु, तथा आगामी कार्यतालिकाको समायोजनजस्ता विषयमा विचार–विमर्श हुने जनाइएको छ।

यसअघि संसद् सचिवालयले जेठ २० गतेदेखि आगामी आर्थिक वर्षको बजेटमाथि छलफल प्रारम्भ गर्ने र जेठ २३ गते उपप्रधान तथा अर्थमन्त्री विष्णु पौडेलले जवाफ दिने कार्यतालिका सार्वजनिक गरेको थियो। तर, जेठ १३ गतेदेखि जारी संसद अवरोधका कारण सो कार्यतालिका प्रभावित भएको हो।

विपक्षी दलहरुले विभिन्न मुद्दा उठाउँदै संसद अवरुद्ध गरेपछि नियमित बैठक सञ्चालन हुन सकेको छैन। संसद् सचिवालयका अनुसार हालको अवरोधका कारण पुरानो कार्यतालिका प्रभावहीन बनेको हुँदा नयाँ कार्यतालिका निर्माणका लागि छलफल आवश्यक भएको हो।

छलफलबाट संसद सञ्चालनको मार्ग प्रशस्त हुने अपेक्षा गरिएको छ।