‘माओवादी डेट एक्सपायर औषधि भइसक्यो’ : हिसिला यमी

काठमाडौँ, असार ११ गते । नेपाल समाजवादी पार्टी (नयाँ शक्ति) की नेतृ हिसिला यमीले नेकपा (माओवादी केन्द्र) माथि कडा आलोचना गर्दै ‘डेट एक्सपायर’ औषधि को संज्ञा दिएकी छन्। सामाजिक सञ्जाल फेसबुकमार्फत यमीले माओवादी अब अप्रासंगिक भइसकेको टिप्पणी गरेकी हुन्।

एक माओवादी समर्थक प्रयोगकर्ता ‘सी जीवन’ ले डा. बाबुराम भट्टराईलाई पुनः माओवादीमा फर्किन आह्वान गर्दै गरिएको पोस्ट शेयर गर्दै यमीले लेखेकी छन्, “माफ गर्नुहोला, हाल माओवादी डेट एक्सपायर औषधि भइसक्यो। त्यसको संरचनाले अब कब्जियत बढाउँछ।”

उनको भनाइले पूर्वमाओवादी पृष्ठभूमि भएका नेताहरूमा पुनः एकताका लागि भइरहेको प्रयासप्रति असहमति संकेत गर्छ। उनले माओवादी संरचनाबाट अब ‘पार नलाग्ने’ जिकिर गर्दै पुन: फर्किन नहुने धारणा सार्वजनिक रुपमा स्पष्ट गरेकी छन्।

बाबुराम–हिसिलाको माओवादी त्याग

डा. बाबुराम भट्टराई र यमी दुवै सशस्त्र माओवादी जनयुद्धका अग्रपंक्तिका नेता थिए। संविधानसभाबाट संविधान जारी भएपछि डा. भट्टराईले २०७३ सालमा माओवादी केन्द्र परित्याग गरी नयाँ शक्ति पार्टी गठन गरेका थिए। त्यसैबेला यमीले पनि माओवादी त्यागेकी थिइन्।

पछि नयाँ शक्ताले मधेशवादी दलहरूसँग मिलेर विभिन्न एकता र फुटको प्रक्रियामा सहभागिता जनाउँदै आएको छ। हाल उनीहरू नेपाल समाजवादी पार्टी (नेसपा) मा क्रियाशील छन्।

पूर्वमाओवादी पुनर्गठनको बहस

यता, माओवादी केन्द्रका अध्यक्ष पुष्पकमल दाहाल ‘प्रचण्ड’ पूर्वमाओवादी नेताहरूलाई पुनः एकीकृत गर्ने गृहकार्यमा जुटिरहेका छन्। नेत्रविक्रम चन्दसहितका नेताहरू पुनः माओवादीमा फर्किने सहमतिमा पुगेका छन् भने केही पुराना नेताहरू फर्किन सक्ने चर्चा पनि बढ्दो छ।

तर यमीको आलोचनाले देखाउँछ कि सबै पूर्वमाओवादीहरू यस्ता प्रयासमा सहमत छैनन्। बरु उनीहरूले माओवादीको विचारधारा, कार्यशैली र राजनीतिक प्रभावकारितामाथि नै प्रश्न उठाउन थालेका छन्।