गगन थापा भन्छन् : संघीयता कार्यान्वयनको निर्मम समीक्षा गर्नुपर्छ

काठमाडौँ, ०२ श्रावण । नेपाली काँग्रेसका महामन्त्री गगनकुमार थापाले संघीयता कार्यान्वयनका क्रममा भएका कमजोरीको निर्मम समीक्षा आवश्यक रहेको बताएका छन्। नेपाल लोकतन्त्रवादी आदिवासी जनजाति महासंघको २८औँ स्थापना दिवसको अवसरमा सोमबार सानेपास्थित पार्टी केन्द्रीय कार्यालयमा आयोजित शुभकामना आदानप्रदान तथा चियापान कार्यक्रममा उनले यस्तो धारणा राखेका हुन्।

थापाले संघीय सरकार प्रभावकारी नहुँदा प्रदेश सरकारहरू संघको प्रतिलिपि मात्रै बनेको उल्लेख गर्दै यस अवस्थाबाट बाहिरिन प्रदेश सरकारलाई सृजनात्मक काममा अग्रसर हुन सुझाव दिए। उनले भने, “संघ र प्रदेशको संसद् अझ बढी समावेशी हुनुपर्छ, निर्वाचन प्रणाली सुधार हुनुपर्छ। नेपाली काँग्रेसले यसको नेतृत्व गर्नुपर्छ।”

विविधतायुक्त नेपालको संविधानले सबैको अपनत्व सुनिश्चित गर्ने प्रयास गरेको उल्लेख गर्दै महामन्त्री थापाले आदिवासी जनजातिको अधिकार सुनिश्चित गर्न संविधानको मर्म अनुसार पहलकदमी गर्नुपर्ने बताए। “इतिहासको मात्रै कुरा गरेर हुँदैन, इतिहासबाट प्रेरणा लिएर अगाडि बढ्नुपर्छ,” उनले जोड दिए।

थापाले जलवायु परिवर्तनको असरबाट सबैभन्दा बढी प्रभावित आदिवासी जनजाति समुदाय रहेको भन्दै तिनले आफ्नो मुद्दा स्थापित गर्न सक्नुपर्नेमा पनि जोड दिए। साथै, उनले नेपाल लोकतन्त्रवादी आदिवासी जनजाति महासंघले समयमै महाधिवेशन गरी पार्टी नेतृत्वलाई विश्वास दिलाएको भन्दै प्रशंसा गरे।

कार्यक्रममा काँग्रेसका सहमहामन्त्री भीष्मराज आङ्दम्वेले संविधानसभाबाट बनेको संविधानसँग सबै जातजातिको जीवन जोडिएको बताउँदै त्यसको रक्षा गर्दै देशलाई स्थिरतातर्फ लैजानुपर्ने धारणा व्यक्त गरे। उनले आदिवासी जनजाति समुदायले आफ्नै अधिकारको लागि समेत निरन्तर संघर्ष गर्नुपर्ने बताए।

कार्यक्रममा काँग्रेसका अन्य नेताहरूको उपस्थिति रहेको थियो भने आदिवासी जनजाति महासंघले आफ्ना आगामी कार्यक्रम र संरचनागत योजनाबारे पनि जानकारी गराएको थियो। कार्यक्रम शुभकामना आदानप्रदानसहित चियापानमार्फत सम्पन्न भएको थियो।