बाटो सहज भएपछि घान्द्रुक जाने पर्यटक बढ्दै

पोखरा, २० असोजः कास्कीको अन्नपूर्ण गाउँपालिका वडा नम्बर १० र ११ पर्ने पर्यटकीय गाउँ घान्द्रुक पुग्ने बाटो सहज भएसँगै पर्यटकको सङ्ख्या बढ्न थालेको छ । बाढीपहिरोका कारण अवरुद्ध भएको बिरेठाँटी–घान्द्रुक सडक सञ्चालनमा आएसँगै पर्यटकहरु घान्द्रुक पुग्न थालेका हुन् ।

बाटो सहज भएसँगै गाउँमा पर्यटकको चहलपहल सुरु हुन थालेको घान्द्रुकस्थित निर्मल भिल्लाकी प्रबन्ध निर्देशक स्नेहा गुरुङले जानकारी दिनुभयो । बाढिपहिरोले बाटो अवरुद्ध हुँदा शून्य अवस्थामा पुगेको घान्द्रुकको पर्यटन व्यवसाय अब चलयमान हुने आशा जागेको उहाँले बताउनुभयो । “चाडपर्वसँगै पर्यटकको सिजन पनि सुरु भयो । बाटो पनि सहज भएको छ,” उहाँले भन्नुभयो, “असार, साउन र भदौमा पर्यटक शून्य नै थियो । अहिले विस्तारै आउन सुरु गर्नु भएको छ । अब केही हुन्छ की भन्ने आशा पलाएको छ ।”

होटल रक एण्ड मुडका सञ्चालक तथा रोधी क्लब घान्द्रुकका अध्यक्ष लक्षिण गुरुङले घान्द्रुक पुग्ने बाटो सहज बनेको सन्देश फैलाउन जरुरी रहेको बताउनुभयो । “पर्यटक आउन सुरु गर्नुभएको छ तर तर अझै पनि धेरैलाई बाटो खराब छ भन्ने लागेको हुनसक्छ,” उहाँले भन्नुभयो, “धेरैले घान्द्रुकको बनेको छैन भनेर योजना क्यान्सिन पनि गर्नुभएको होला । अब हामीले बाटो सहज छ ढुक्कसँग घुम्न आउनुहोला भन्ने सन्देश प्रवाह गर्नुपर्नेछ ।”

निरन्तरको वर्षाले विभिन्न स्थानमा खसेको पहिरो पन्छाएर बाटो सहज बनाएपछि पर्यटक घान्द्रुक पुग्न थाले पनि सोचेअनुरुप नभएको उहाँको भनाइ छ । “साउन भदौमा जस्तो पाहुना आउँदै नआएको त हैन् । तर अझै पर्याप्त छैन”, उहाँले भन्नुभयो, “मेरो होटलमा ४५ जनासम्म राख्न सक्छु । यो समयमा अघिल्ला वर्षहरुमा भरिभराउ हुन्थ्यो तर यो पटक दैनिक पाँच सात मात्र जना आउनुभएको छ ।”

बाटोसँगै मौसम खुलेपछि घान्द्रुकको पर्यटन व्यवसाय विस्तारै चलयमान हँुदै गएको घान्द्रुक पर्यटन व्यवस्थापन समितिका अध्यक्ष विक्रम गुरुङले बताउनुभयो । अहिले दैनिक रुपमा दुई देखि तीन सय पर्यटक घान्द्रुक पुग्ने गरेको उहाँले जानकारी दिनुभयो । “यो बेला पर्यटक आउने समय नै हो । यही समयमा बाटो बिग्रँदा निकै चिन्ता लागेको थियो । सबैको पहलमा बाटो बनाएपछि पाहुना आउन थाल्नुभएको छ,” उहाँले भन्नुभयो, “पहिला पहिला यही समयमा बस्ने ठाउँ नपुगेर पाहुना फर्काउनुपर्ने अवस्था थियो । यो वर्ष विस्तारै बढ्ने क्रम जारी छ । अहिले दैनिक दुई तीन सय जना आउनुहुन्छ ।”

अध्यक्ष गुरुङ पनि घान्द्रुकको बाटो सहज भएको सन्देश सबैसामु पु¥याउनुपर्ने बताउनुहुन्छ । “यो समय सबैभन्दा बढी नेपाली पाहुनाहरु आउने समय हो । निरन्तर वर्षा हुँदा बाटो अवरुद्ध भएको थाहा भए पनि खुलेको थाहा नहुन सक्छ,” उहाँले भन्नुभयो, “त्यसैले हामी घान्द्रुकवासीको एउटै आग्रह छ । मौसमसँगै बाटो पनि खुलेको छ । निर्धक्क भएर घुम्न आउनुहोला हामी स्वागत गर्न तयार छौँ ।”

अध्यक्ष गुरुङका अनुसार पर्यटकीय गाउँ घान्द्रुकमा एक दिनमा दुई हजार पाँच सय पाहुना राख्न सकिन्छ । पाहुना धेरै भएको खण्डमा गाउँकै घरहरुमा पनि व्यवस्थापन गर्न सकिने उहाँले जानकारी दिनुभयो । “घान्द्रुकमा अहिले होटल ९५ वटा र ४५ वटा होमस्टे छन् । यी होटल तथा होमस्टेमा एक दिनमा दुई हजार पाँच सय पाहुना राख्न सकिन्छ,” उहाँले भन्नुभयो, “पाहुना धेरै भएको खण्डमा व्याक्तिगत घरमा पनि व्यवस्थापन गर्न सकिन्छ । गाउँ आएको पाहुना फर्काउन नपरोस् भन्ने हाम्रो मान्यता छ ।”