केपी ओली र माधवकुमार नेपालबीचको भेटवार्ता सकारात्मक

काठमाडौंः सत्तारुढ नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपालबीचको भेटवार्ता सकिएको छ ।

बुधबार दिउँसो नेता नेपालको सन्देश बोकेर योगेश भट्टराई बालुवाटार पुगेर संवाद र छलफलबाट समस्या समाधान गर्न अध्यक्ष ओलीसँग आग्रह गरेका थिए । त्यसपछि बुधबार साँझ नै नागपोखरीस्थित होटल मेरियटमा ओली र नेपालबीच भेटवार्ता भएको हो । भेटवार्तामा अर्थमन्त्री समेत रहेका नेता बिष्णु पौडेलको पनि उपस्थिति रहेको थियो ।

ओली र नेपालबीचको आज करिब दुई घण्टा लामो वार्ता भएको छ । उनीहरुबीच पार्टीभित्र देखिएका अन्तरसङ्घर्ष व्यवस्थापन गर्ने सम्बन्धमा छलफल भएको हो । दुईबीचको वार्ता ‘सकारात्मक निष्कर्षसहित’ सम्पन्न भएको प्रधानमन्त्री ओलीको सचिवालयका एक सदस्यले बताए ।

नेपालले सञ्चारकर्मीसँग ‘म केही बोल्दिनँ’ भनेर निस्किएको बताइएको छ ।

मंगलबार माधवकुमार नेपाल, झलनाथ खनालसहित २७ जना संघीय सांसद र पाँच कर्णाली प्रदेशका सांसदलाई किन सांसद पदबाट पदमुक्त नगर्ने भन्दै स्पष्टीकरण अध्यक्ष ओलीले सोधेपछि दुई समूहबीच झनै तिक्तता बढेको छ । नेपाल समूह अध्यक्ष ओलीको निर्णय बदरको माग राखेर सर्वोच्च अदालतमा पनि पुगेको छ ।

बुधबार ओली र नेपालबीच भएको भेटवार्ताको तस्बिर ओलीका प्रेस सल्लाहकार सूर्य थापाले सार्वजनिक गरेका छन् ।