स्वास्थ्यकर्मीमाथि आक्रमणका दोषीमाथि कार्वाही गर्न अध्यादेशमार्फत कानुन ल्याउने मन्त्रिपरिषद्को निर्णय

काठमाण्डौंः सरकारले स्वास्थ्यकर्मी र स्वास्थ्य संस्थामाथि हुने आक्रमणका दोषीमाथि कारबाही गर्न अध्यादेशमार्फत कानुन ल्याउने निर्णय गरेको छ ।

प्रधानमन्त्री निवाश बालुवाटारमा बिहीबार साँझ बसेको मन्त्रिपरिषद्को बैठकले कार्यस्थलमा दिनहुँ जसो स्वास्थ्यकर्मीहरुमाथि आक्रमण हुन थालेपछि अध्यादेशमार्फत कडा कानून ल्याउने निर्णय गरेको हो ।

बैठकले स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन २०६६ संशोधन अध्यादेश जारीका लागि राष्ट्रपतिसमक्ष सिफारिस गर्ने निर्णय गरेको कानुन न्याय तथा संसदीय मामिलामन्त्री लीलानाथ श्रेष्ठले जानकारी दिए ।

स्वास्थ्य मन्त्रालयको प्रस्तावमा ल्याउन लागिएको अध्यादेशमा स्वास्थ्यकर्मीलाई कुटपिट गरी अंगभंग तुल्याएमा, घाइते तुल्याएमा ३ वर्ष कैद र ३ लाखसम्म जरिबाना र अस्पताल आगजनी गरे ३ देखि ५ लाख रूपैयाँसम्म जरिवाना र २ देखि ५ वर्षसम्म कैद सजाय हुने व्यवस्था गरिएको छ ।