निर्माण व्यवसायी महासंघको नेतृत्वमा तीन जनाको उम्मेदवारी

काठमाडौंः नेपाल निर्माण व्यवसायी महासंघको अध्यक्ष पदका लागि तीन जनाको उम्मेदवारी परेको छ। निर्वाचन समितिका प्रमुख निर्वाचन अधिकृत टंक दुलालले महासंघका वर्तमान अध्यक्ष रवि सिंह, वरिष्ठ उपाध्यक्ष निकोलस पाण्डे र हुमनाथ कोइरालाले अध्यक्ष पदका लागि उम्मेदवारी दिएको जानकारी दिए।

उम्मेदवारी फिर्ता लिने समय शनिबार साँझ ५ बजेसम्म तोकिएको थियो। आज मतदान हुनेछ। महासंघको पूर्ण समितिमा ५९ सदस्य हुने भए पनि हाल ४६ सदस्यका लागि मात्र निर्वाचन हुन लागेको छ। अन्य सदस्यहरू मनोनित र पदेन हुने व्यवस्था छ।

मतदाता संख्या १ हजार १ सय ९८ रहेको निर्वाचन समितिले जानकारी दिएको छ। शुक्रबार सुरु भएको महासंघको २३औं साधारणसभा तथा १२औं अधिवेशन आजसम्म चल्नेछ। देशका ७७ जिल्लाबाटै निर्माण व्यवसायीसम्बद्ध प्रतिनिधिहरू नयाँ नेतृत्व छान्नका लागि काठमाडौंमा जम्मा भएका छन्। -राजधानी दैनिक