चुनावी चटारो : प्रधानमन्त्री एकै दिन तीन जिल्लामा

काठमाडौंः ३० वैशाखमा हुने स्थानीय तह निर्वाचनका लागि निर्वाचन आयोगले सक्रियता बढाएसँगै राजनीतिक दल तथा दलका नेताहरूलाई चुनावी चटोरोले छोपेको छ ।

प्रमु्ख सत्तारुढ दल नेपाली कांग्रेससहितका सत्तारुढ दल नेकपा माओवादी केन्द्र, नेकपा एकिकृत समाजवादी, जसपा र प्रमुख प्रतिपक्षी दल नेकपा एमालेसहित, राप्रपा, राप्रपा नेपाल, लोकतान्त्रिक समाजवादी पार्टी (लोसपा)लगायतका दलहरू जिल्ला हुँदै गाउँ केन्द्रित बनेका छन् । केन्द्रीय तहमा रहेका शीर्ष नेतालाईसमेत जिल्ला जान भ्याइनभ्याइ छ ।

गाउँमा कांग्रेस

कांग्रेसले स्थानीय तहको निर्वाचनलाई केन्द्रित गर्दै २९ फागुनदेखि २९ चैतसम्म सञ्चालन गर्ने गरी एक महिने निर्वाचन विशेष अभियान नै सुरु गरिसकेको छ । कांग्रेसले ७७ वटै जिल्लामा केन्द्रीय कमाण्डर तोकेर ७५३ वटै स्थानीय तहमा खटाएको हो । कांग्रेसले स्थानीय तहको निर्वाचन केन्द्रित अभियानलाई ‘घरघर जाऔं कांग्रेस जिताऔं’ नारा दिएको छ ।

माओवादी केन्द्रको सात प्रदेशमा २८ कमान्ड

यसैगरी, माओवादी केन्द्रलेसमेत दुई महिने निर्वाचन अभियान सुरु गरिसकेको छ । माओवादी केन्द्रले दुई महिने चुनावी अभियान घोषणा गर्दै सात प्रदेशमा २८ कमान्ड बनाएको हो ।

माओवादी केन्द्रले ‘समाजवाद उन्मुख समृद्धिका लागि स्थानीय सरकार’ भन्ने मूल नारासहित अभियान सुरु गरेको हो । जसअनुसार वैचारिक राजनैतिक कार्यक्रम, संगठन सुदृढीकरण, व्यवस्थापकीय कार्यक्रम, सूचना सञ्चार तथा प्रचारसम्बन्धी कार्यक्रम, अध्ययन सर्वेक्षण तथा विश्लेषणसम्बन्धी कार्यक्रम, राजनीतिक तथा प्रशासनिक समन्वय, सांस्कृतिक कार्यक्रमजस्ता कार्यक्रम माओवादी केन्द्रले तय गरेको हो । हाल माओवादीले प्रदेशगत प्रशिक्षण र बैठक सञ्चालन गर्दै आइरहेको छ ।

नेकपा एसका सातै प्रदेशमा पदाधिकारी

नेकपा एकीकृत समाजवादीले स्थानीय तहको निर्वाचन परिचालनका लागि सातै प्रदेशमा पदाधिकारीलाई खटाइसकेको छ । गत बिहीबार बसेको सचिवालय बैठकमार्फत सो दलले स्थानीय तहको निर्वाचन अभियानका लागि प्रदेश १ मा उपाध्यक्ष प्रमेश हमाल, मधेश प्रदेशमा उपमहासचिव जगन्नाथ खतिवडा, बागमतीमा उपमहासचिव गंगालाल तुलाधार, गण्डकीमा उपाध्यक्ष जयन्ती राई, लुम्बिनी प्रदेशमा उपमहासचिव विजय पौडेल, कर्णालीमा महासचिव बेदुराम भुसाल र सुदूरपश्चिममा स्थायी समिति सदस्य रामचन्द्र झालाई खटाएको हो ।

नेकपा एसले स्थानीय तह निर्वाचनका लागि ‘जनतामा जाऊँ, एकीकृत समाजवादीलाई जिताऊँ’ भन्ने नारासहित चुनावी अभियान संचालन गर्न लागेको हो । सातै प्रदेशमा खटिएका टोलीले सबै प्रदेश, पालिका र वडाको ‘रिपोर्टिङ’ लिनेछ ।

जसपा पनि गाउँ केन्द्रित हुँदै

जनता समाजवादी पार्टी नेपाल पनि स्थानीय तह निर्वाचनका लागि तयारीका साथ अघि बढेको छ । पार्टीको केन्द्रीय कमिटी बैठकमार्फत जसपाले स्थानीय तहमा प्रभावकारी रूपमा निर्वाचन लक्षित कार्यक्रम लैजाने निर्णय गरिसकेको छ । जसपाले स्थानीय तहको निर्वाचनलाई लक्षित गरेर हरेक गाउँपालिकामा कम्तीमा एक जना केन्द्रीय सदस्यलाई खटाउने योजना बनाएको हो ।

राप्रपाको देशभर घरदैलो

राष्ट्रिय प्रजातन्त्र पार्टीले स्थानीय तह निर्वाचनलाई लक्षित गरी देशभर घरदैलो अभियान गर्दै छ । गत बुधबार बसेको पार्टी पदाधिकारी बैठकले २८ चैतबाट ‘जनताको माझमा राप्रपा’ घरदैलो अभियान सञ्चालन गर्ने निर्णय गरेको प्रवक्ता मोहन श्रेष्ठले जानकारी दिए । सो कार्यक्रमका लागि ७७ वटै जिल्लामा केन्द्रीय नेतालाई राप्रपाले खटाइसकेको छ ।

संगठन बनाउँदै राप्रपा नेपाल

गत ७ फागुनमा घोषणासभामार्फत पुनर्जागृत भएको राप्रपा नेपाल संगठन निर्माणसँगै स्थानीय निर्वाचनको तयारीमा जुटेको छ । राप्रपा नेपालले ७७ वटै जिल्लामा पार्टी संगठन बनाउँदै स्थानीय तह निवाचन अभियानलाई पनिसँगै अघि बढाँउदै छ ।

राप्रपा नेपालले चैत्र मसान्तभित्र ७७ वटै जिल्लामा जिल्ला कार्यसमिति गठन गर्दै स्थानीय तहसम्म पार्टी संगठनलाई विस्तार गर्ने बताइएको छ ।

प्रधानमन्त्री एकै दिन तीन जिल्लामा

नेपाली कांग्रेसका सभापतिसमेत रहेका प्रधानमन्त्री शेरबहादुर देउवा शनिबार एकै दिन दोलखा, रामेछाप र काभ्रेपलान्चोकका विभिन्न स्थानमा आयोजित कार्यक्रममा सहभागी हुन पुगेका हुन् । उनले कार्यक्रमकै क्रममा सहभागष्ी हुँदै गर्दा आफ्ना पार्टीका नेताकार्यकर्तालाई स्थानीय तहको निर्वाचनमा केन्द्रित हुन निर्देशनसमेत दिए ।

प्रधानमन्त्री देउवा शनिबार दोलखाको माथिल्लो तामाकोसी जलविद्युत् आयोजनाको निरीक्षणमा पुगेका थिए । उनले शनिबार नै रामेछापको मन्थली नगरपालिका–१३ को साँखे (फुलासी)स्थित नयाँ खिम्ती (२२०÷१३२ केभी क्षमता) सबस्टेसन पनि उद्घाटन गरे ।
त्यसपछि प्रधानमन्त्री देउवा काभ्रेको तेमाल गाउँपालिकाको प्रसासकीय भवनको उद्घाटन गर्न पुगेका हुन् । सो कार्यक्रममा उनले पार्टीका नेताकार्यकर्तालाई सम्बोधनसमेत गरेका थिए ।

दलका शीर्ष नेताहरूलाई यतिबेला जिल्ला जिल्लामा पार्टीका कार्यक्रममा जान भ्याइनभ्याइ छ । ३० वैशाखका लागि तय भएको स्थानीय तह निर्वाचनलाई केन्द्रित गर्दै प्रदेशस्तर देखि जिल्ला हुँदै गाउँ स्तरसम्म नेताका दौडधूप बढेको छ ।

ओलीको सरकार गयो, अहंकार गएन : कांग्रेस महामन्त्री शर्मा

नेपाली कांग्रेसका महामन्त्री विश्वप्रकाश शर्माले पूर्वप्रधानमन्त्री केपी शर्मा ओली सरकारबाट बिदा भए पनि अहंकार भने कायमै राखेको भन्दै ओलीको अभिव्यक्तिप्रति कटाक्ष गरेका छन् ।

एमाले अध्यक्ष ओलीले शनिबार एक कार्यक्रममा कांग्रेसलाई १३ सिटमा झारिदिने अभिव्यक्ति दिएपछि त्यसको प्रतिवाद गर्दै कांग्रेस महामन्त्री शर्माले ओलीलाई बोलीमा ध्यान दिन सुझाएका हुन् ।

‘पूर्वप्रधानमन्त्री तपाईं दलको मात्र होइन, देशको हो, आफ्नो उचाइको गरिमाबाट ओरालो नझर्नोस्, ओलीको सरकार गयो गएन अहंकार अझै,’ शर्माले कीर्तिपुरमा आयोजित एक कार्यक्रममा सम्बोधनका क्रममा भने ।

शर्माले गत निर्वाचनमा कम्युनिस्ट पार्टीहरू एक भएर निर्वाचनमा आएकाले कांग्रेसले हारेको बताउँदै शर्माले निर्वाचनमा जनताबाट पाएको जनमतलाई एमालेले जोगाउन नसकेको समेत बताए । – राजधानी