गठबन्धनले गणतन्त्रलाई असफल बनाएर लुटतन्त्र मच्चायोः सीपी गजुरेल

काठमाण्डौः नेकपा (क्रान्तिकारी माओवादी)का उपाध्यक्ष सीपी गजुरेलले वर्तमान सत्ता गठबन्धनले संघीय लोकतान्त्रिक गणतन्त्रात्मक व्यवस्थालाई असफल बनाएर लुटतन्त्र मच्चाएको आरोप लगाएका छन्।

जनकपुर विमानस्थलमा आइतबार पत्रकारहरुसँग बोल्दै उपाध्यक्ष गजुरेलले संसदीय राजनीति गर्ने दलहरुले लोकतान्त्रिक गणतन्त्रात्मक व्यवस्थाका नाममा भागवण्डाको राजनीति गरेर जनताप्रति उत्तरदायी नबनेको बताए।

नेता गजुरेलले अहिले राजनीतिक दलका नेताहरुले लोकतान्त्रिक गणतन्त्रको मूल मर्म र आदर्शसमेत त्याग गरेको बताए। नेता गजुरेलले अंशवण्डा र भागवण्डाको राजनीति गरेर मुलुकमा अस्थिरता निम्त्याउँदै व्यक्तिवादी राजनीतिक गर्न चाहेकाले देशमा वैदेशिक हस्तक्षेप ह्वात्तै बढेकोप्रति चिन्तासमेत व्यक्त गरे।