माओवादी अध्यक्ष दाहाल विरुद्ध प्रहरीमा किटानी जाहेरी (पूर्णपाठ)

काठमाण्डौंः नेकपा (माओवादी केन्द्र)का अध्यक्ष पुष्पकमल दाहाल प्रचण्ड विरुद्ध प्रहरीमा किटानी जाहेरी परेको छ । पूर्व प्रधानमन्त्री समेत रहेका दाहाल विरुद्ध द्वन्द्व पीडित ज्ञानेन्द्रराज आरणले जाहेरी दिएका हुन् ।

आफ्ना पिता टिकाराज आरणलाई २०५७ फागुन १६ गते रामेछापको साविक पुरानागाउँ-५ (हाल मन्थली नगरपालिका ९)मा साँझ ७ बजे माओवादीले गोली हानेर हत्या गरेको भन्दै दाहाल विरुद्ध प्रहरी प्रधान कार्यालय, नक्सालमा जाहेरी परेको हो।

“द्वन्द्वकालमा मारिएका १७ हजार मध्ये ५ हजारको जिम्मा म लिन्छु बाँकीको जिम्मा तत्कालीन राज्य पक्षले लिनुपर्ने जिकिर पुष्पकमल दाहाल ‘प्रचण्ड’ को। मेरो पिताजी टिकाराज आरणको हत्या सम्बन्धमा ‘आयोगका केही सिफारिसहरुको कार्यान्यन र पीडितको अवस्था अध्ययन प्रतिवेदन २०७५ राष्ट्रिय मानव अधिकार आयोग, हरिहर भवन, ललितपुर, नेपालको पृ. २६–३६ मा प्राणदण्ड दिनु कानुन, धर्म र मानवीय पक्षबाट गलत भन्ने उल्लेख भएको पाइन्छ” जाहेरीको कसुरसँग सम्बन्धित अन्य विवरणमा भनिएको छ, “बाँकी मारिएका १२ हजाको कारक पनि प्रचण्ड नै हो। त्यसैगरी द्वन्द्वकालमा वेपत्ता पारिएका, अंगभंग, कब्जा गरिएका, विस्थापित, चल  सम्पत्ति लुटपाटमा परेका, बालसैन्य भर्ती लगायतका अमानवीय कार्यको सम्पूर्ण जिम्मा प्रचण्डले नै लिनु पर्दछ।”

द्वन्द्वकालमा नेकपा (माओवादी)द्वारा अपहरण गरी यातना दिंदै गोली प्रहार गरी म जाहेरवालाको पिताजी टिकाराज आरणको हत्या भएको र जिल्ला प्रहरी कार्यालय रामेछापले पनि घटनाको अभिलेख राखी पीडित पक्ष र साक्षीसँग बयान लिएको जाहेरीमा उल्लेख छ।

तिहार बिदाका कारण आफूले इमेलमार्फत जाहेरी दर्ता गराएको आरणले जानकारी दिए। यसअघि उनले राष्ट्रिय मानव अधिकार आयोगमा पनि दाहाल विरुद्ध निवेदन दर्ता गराएका छन्।

किटानीमा जाहेरीको पूर्णपाठः