राष्ट्रिय सभा बैठक बस्दै, यस्तो छ कार्यसूची

काठमाडौंः संघीय संसद् अन्तर्गत राष्ट्रिय सभाको बैठक बस्दैछ। बैठक अपरान्ह ४ बजे संसद् भवनमा बस्ने बताइएको छ। आजको बैठकमा उपप्रधान एवं अर्थमन्त्री विष्णुप्रसाद पौडेलले आर्थिक वर्ष २०७९/०८० को बजेटको अर्ध वार्षिक मूल्यांकन प्रतिवेदनको सम्बन्धमा वक्तव्य दिनेछन्।

यसका साथै दिगो विकास तथा सुशासन समितिका सभापति प्रकाश पन्थले दिगो विकास तथा सुशासन समितिको वार्षिक प्रतिवेदन २०७८/०७९ सभा समक्ष पेस गर्ने कार्यसूची रहेको छ। यस्तै राष्ट्रिय सरोकार तथा समन्वय समितिकी सभापति दिलकुमारी रावल थापाले राष्ट्रिय सरोकार तथा समन्वय समितिको आव २०७५/०७६, ०७६/०७७ र ०७७/०७८ को वार्षिक प्रतिवेदन कार्यान्वयनको अनुगमन मूल्यांकन प्रतिवेदन २०७९ सभा समक्ष पेस गर्नेछिन्।

कानून, न्याय तथा संसदीय मामिलामन्त्री ध्रुवबहादुर प्रधानले नेपाल सरकारबाट मन्त्रिपरिषद्को मिति २०७९/०६/२८ गतेको निर्णयबाट जारी भएको बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ बमोजिमको बाधा अड्काउ फुकाउ आदेश सभा समक्ष पेस गर्ने पनि कार्यसूची रहेको बताइएको छ। यसका साथै राष्ट्रिय सभा अध्यक्षले प्रतिनिधि सभाका पूर्व सांसद कर्मा घलेको निधनमा शोक प्रश्ताव प्रस्तुत गर्ने कार्यसूची रहेको राष्ट्रिय सभा सचिवालयले जनाएको छ।