बेलारुसमा रुसको गुप्तचर विमान ध्वस्त पारिएको दाबी

काठमाण्डौः बेलारुसबाट निर्वासित विपक्षी दलहरूको संगठनले राजधानी मिन्स्क नजिक रहेको एक एयरस्ट्रिपमा रुसी विमान नष्ट गरिएको दाबी गरेको छ ।

‘पार्टिसन्सले मिन्स्क नजिक माचुलिश्ची एयरफील्डमा रुसको विमान ध्वस्त पार्नका लागि विशेष कारवाही गरेका छन्,’ फ्रानाक भियाकोर्काले ट्वीटमार्फत जानकारी दिए । उनी विपक्षी नेत्री स्वेत्लाना त्सिखानुस्कायाका सल्लाहकार हुन् ।

यस कारवाहीमा दुईजना बेलारुसीले ड्रोन उपयोग गरेका थिए । उनीहरू दुवैजनाले देश छोडिसकेको र सुरक्षित रहेको पनि बताइएको छ । रुसको ए–५० गुप्तचर विमानलाई तारो बनाइएको भियाकोर्काको भनाइ छ । विमानको मूल्य ३४ करोड ८० लाख डलर छ ।

‘बेलारुसमा रुसले गरेको नियन्त्रणलाई प्रतिकार गर्ने तथा युक्रेनको स्वतन्त्रताका लागि लड्ने सबै बेलारुसीहरूप्रति मलाई गर्व छ,’ विमान नष्ट गरिएको खबरपछि त्सिखानुस्कायाले ट्वीट गरिन् ।

यस कारवाहीलाई स्वतन्त्र रूपमा पुष्टि गरिएको छैन । रुसी सेनाले यस विषयमा बयान जारी गरिसकेको छैन ।  एजेन्सी