आयुर्वेद क्याम्पस कीर्तिपुरमा स्ववियु चुनावको माग गर्दै नेविसंघले शुरु गर्यो रिले अनसन

अनेरास्ववियु र अखिल क्रान्तिकारीले फागुन २५ गते निर्वाचन समितिको कार्यलयमा गरेको तालाबन्दीका कारण स्थगित भएको स्ववियु चुनावको कार्यक्रम पुनः सुचारु गर्न दबाब स्वरुप नेविसंघले अनसन सुरु गरेको हो। निर्वाचन समितिले तालाबन्दीका कारण देखाउँदै पूर्व घोषित निर्वाचनको कार्यक्रम अगाडी बढाउन नसकेको सूचना प्रकाशित गरेको थियो।

स्थगित भएको स्ववियु निर्वाचनको सुनिश्चिताको लागि दबाबमूलक कार्यक्रम अन्तर्गत शुक्रबार दिउँसोबाट विद्यार्थीहरु इन्द्रमणि बस्याल र आशिष अर्यालले अनसन सुरु गरेका हुन्।

‘हामीले पूर्व निर्धारित तालिका बमोजिम स्ववियुको निर्वाचन होस् भन्ने एक सुत्रीय माग राखेर रिले अनसन सुरु गरेका हौँ।’, अनसनरत विद्यार्थी इन्द्रमणि बस्यालले भने।

अन्तिम परीक्षा दिइसकेका बिएएमएस इन्टर्न प्रशिक्षार्थीले पनि निर्वाचनमा भाग लिन पाउनुपर्छ भन्दै अनेरास्ववियु र अखिल क्रान्तिकारीले हिजो तालाबन्दी गरेका थिए।

यद्यपि त्रिविले यसपटकको स्ववियु निर्वाचनमा अन्तिम परिक्षामा सामेल भएका विद्यार्थी स्ववियु निर्वाचनमा सामेल हुन नपाउने नयाँ व्यवस्था राखी निर्देशिका जारी गरेको छ। इन्टरर्न प्रशिक्षार्थीले अन्तिम परीक्षा उत्तीर्ण गरिसकेको हुनाले महाराजगञ्ज मेडिकल क्याम्पसमा पनि एमबिबिएसका इन्टर्न प्रशिक्षार्थीले यसपटकको स्ववियुमा मतदान गर्न पाउने छैनन्।