यात्रु लिएर कतार एयरवेज अमेरिका र नेपाल एयरलाइन्ज जापान जाँदै

काठमाडौं । अमेरिका र जापानले आइतबार साँझ नेपालबाट केही नेपालीसहित आफ्ना नागरिकहरु स्वदेश लैजाँदै छन्।

कतार एयरवेजले साँझ ७ बजे नेपालबाट अमेरिकी नागरिक लैजाँदै छ। अमेरिकाले लकडाउन सुरुभएयता तेस्रोपटक नेपालबाट आफ्ना नागरिक लैजान लागेको हो। यसमा नेपाली मुलका मानिसहरु पनि छन्। विमानमा ३ सय बढी यात्रु हुने बताइएको छ।

यसैगरि राती ९ बजे नेपाल एयरलाइन्सको विमान जापानको नारिताका लागि उड्दै छ। यसमा पनि केही नेपालीहरु छन्। जापानले यसअघि पनि नेपालबाट आफ्ना नागरिक लगेको थियो। त्यतिबेला पनि नेपाल एयरलाइन्सको जहाज प्रयोग भएको थियो।

नेपालमा लकडाउन सुरु भएपछि यहाँबाट ४२ पटक उद्धारका फ्लाइटहरु भएका छन्। कतार एयरवेजले मात्र ११ पटक उद्धारको फ्लाइट गरेको छ। लकडाउनदेखि नेपालमा उद्धार र कार्गोबाहेक अन्य सबै घरेलु तथा अन्तर्राष्ट्रिय फ्लाइट प्रतिबन्धित छन्।

यसैबीच आइतबार मेडिकल सामग्री लिन चीनको चाङ्सा पुगेको हिमालयन एयरलाइन्सको विमान राति फर्कँदै छ।