धानको समर्थन मूल्य तोक्ने सरकारको निर्णय

काठमाडौँ : सरकारले धानको समर्थन मूल्य तोकेको छ। मंगलबार बसेको मन्त्रिपरिषद् बैठकले मोटा धानको प्रतिक्विन्टल ३ हजार १९८ र मध्यम धानको प्रतिक्विन्टल ३ हजार ३६२ रुपैयाँ समर्थन मूल्य पनि तोकेको हो।

सूचना तथा सञ्चारमन्त्री एवं सरकारकी प्रवक्ता रेखा शर्माले उक्त जानकारी दिएकी हुन्। मन्त्री शर्माले यो मूल्य पहिलाभन्दा साढे २ सय रुपैयाँले बढी भएको उल्लेख गरिन्।

उनले भनिन्, ‘आज कृषि मन्त्रालयको प्रस्तावमा धानको समर्थन मूल्य तोक्ने काम भएको छ। अहिले मोटा धानको प्रतिक्विन्टल ३ हजार १९८ र मध्यम धानको प्रतिक्विन्टल ३ हजार ३६२ रुपैयाँ समर्थन मूल्य तोकिएको छ।’

त्यसैगरी अनुचित लेनदेन, मिटरब्याज सम्बन्धी जाँचबुझ आयोगको म्याद ३ महिना थप गर्ने निर्णय गरिएको छ।

संघीय निजामती सेवा ऐन अनुसार वरीयताको आधारमा लक्ष्मीकुमारी बस्नेत सचिव पदमा बढुवा भएकी छन्।