प्रथम वीरगन्ज गोल्डकपको उपाधि पुलिस क्लबले जित्यो

काठमाण्डौंः त्रिभुवन आर्मी क्लबलाई स्तब्ध पार्दै नेपाल पुलिस क्लबले प्रथम वीरगन्ज गोल्डकपको उपाधि जितेको छ ।

वीरगञ्जको आदर्शनगर रङ्गशालामा भएको फाइनल खेलमा त्रिभुवन आर्मीलाई टाई ब्रेकरमा शून्यका विरुद्ध २ गोलले पराजित गर्दै नेपाल पुलिस क्लबले उपाधि जितेको हो ।

निर्धारित समयमा दुवै टिमले गोलरहित बराबरी खेलेपछि नतिजा टाई ब्रेकरबाट निकालिएको हो । टाई ब्रेकरमा आर्मीका चार खेलाडीको प्रहार फितलो बन्न पुग्दा पुलिसले सिजनकै पहिलो उपाधि उचाल्न सफल भएको हो ।

उपाधि विजेता नेपाल पुलिस क्लबले नगद ११ लाख ११ हजार १ सय ११ र उपविजेता त्रिभुवन आर्मीले पाँच लाख ५५ हजार पाँच सय ५५ प्राप्त गरेका छन् । यो राशि मधेस प्रदेशमा आयोजना हुने फुटबल प्रतियोगिता मध्येको उच्च राशि हो ।

वीरगन्ज महानगरपालिकाको मुख्य सहयोग र भेट्रान्स सिटी क्लब वीरगन्जको आयोजनामा कार्तिक १८ गतेदेखि सुरु भएको प्रतियोगितामा नेपाल र भारतका आठ टिमको सहभागिता रहेको थियो ।

प्रतियोगिताको सर्वोत्कृष्ट खेलाडीलाई नगद ५० हजार र विधागततर्फ उत्कृष्ट हुने खेलाडीलाई जनही २० हजार रुपैयाँ प्रदान गरिएको प्रतियोगिताका प्रेस संयोजक तिवारी यादवले जानकारी दिनुभयो ।