डिप्लोमा सञ्चालनका लागि ३ लाख दिने सहमतिपछि महोत्सव स्थगित

नुवाकोट । त्रिभुवन त्रिशुली माध्यमिक विद्यालयले गर्ने भनिएको दशंै महोत्सव व्यवसायीहरुको दवावका कारण स्थगित भएको छ ।

विद्यालयले इन्जिनियरिङ कक्षा सञ्चालनका लागि भन्दै महोत्सव गर्ने तयारी गरेको भएपनि व्यवसायीहरुले चाडबाडका बेला महोत्सव गर्दा आफुहरुलाई असर पर्ने भन्दै स्थानीय निकाय र प्रशासन मार्फत दवाव सिर्जना गरेका थिए ।

व्यवसायीहरुको दवावपछि आपसी सहमतिमा नै विद्यालयले महोत्सव स्थगित गरेको छ । विदुर नगरपालिकाका मेयर सञ्जु पण्डितको अध्यक्षमा बसेको बैठकले महोत्सवको मिति सार्दै मंसिरमा गर्ने निर्णय गरेको छ ।

मंसिरमा हुने महोत्सवका लागि नगरपालिकाले संयोजन गर्ने र नुवाकोट उद्योग बाणिज्य संघले प्रवद्धन गर्ने सहमति पनि भएको विद्यालय व्यवस्थापन समितिका अध्यक्ष नविन्द्रमान प्रधानले युग खबरलाई जानकारी दिनुभयो ।

यस्तै सहमति अनुसार विद्यालय सञ्चालनमा लागि नुवाकोट उद्योग बाणिज्य संघ र नुवाकोट कपडा तथा कस्मेटिक व्यवसायी संघले एक महिना भित्र डिप्लोमा कक्षा सञ्चालनका लागि ३ लाख दिने सहमति पनि भएको छ ।

अर्को महोत्सव मंसिर २८ गतेदेखि पुस ९ गतेसम्म गर्ने तयारी भएको छ । यसअघि विद्यालयले असोज २२ गतेदेखि २८ गतेसम्म महोत्सव गर्नै भन्दै सबै तयारी सुरु गरिसकेको थियो ।

विद्यालयले महोत्सवको तयारी गरेपछि नुवाकोट उद्योग बाणिज्य संघले महोत्सव नगर्न अपिल समेत गरेको थियो । संघको अपिललाई विद्यालयले वेवास्ता गरेपछि जसरी पनि महोत्सव रोक्न दवाव सुरु भएको थियो ।