नुवाकोटका शिक्षक पण्डितको हत्या आरोपमा चार पक्राउ

नुवाकोट, भीरबाट लडेका भनिएको दुप्चेश्वर गाउँपालिका–६ का शिक्षक ५० वर्षीय गणेशबहादुर पण्डितको हत्या गरेको आरोपमा प्रहरीले आइतबार चार जनालाई पक्राउ गरेको छ ।

जिल्ला प्रहरी कार्यालय नुवाटले दिएको जानकारी अनुसार पक्राउपर्नेमा २४ वर्षीय सुरजन तामाङ, ३१ वर्षीय राजकुमार तामाङ, ३६ वर्षीय दीपबहादुर तामाङ र १९ वर्षीय महेन्द्र तामाङ छन् । अभियुक्तविरुद्ध नै कर्तव्य ज्यान मुद्दा दायर गरी अनुसन्धान थालिएको प्रहरीले जनाएको छ ।

शिक्षक पण्डितको शव शुक्रबार बेलुका स्थानीय बासबोटे जंगलमा भीरबाट लडेर शंकास्पद अवस्थामा फेला परेपछि प्रहरीले तिनलाई पक्राउ गरी अनुसन्धान शुरु गरेको प्रहरी नायब उपरिक्षक भीमलाल भट्टराईले जानकारी दिनुभयो ।

नवज्योति आधारभूत विद्यालयका प्रधानाध्यापक पण्डितको घर नजीकैको भीरबाट खसेर ज्यान गएको हो । उहाका परिवार तथा आफन्तले पनि हत्याको आंशका गर्दै छानविनको माग गरेका थिए ।