आहा रारा पोखरा गोल्डकप : शनिबारदेखि क्वाटर फाइनलका खेल हुने

काठमाण्डौंः विभागीय टोली नेपाल पुलिस क्लब पोखरामा जारी २३ औँ संस्करणको आहा रारा पोखरा गोल्ड कपको क्वाटर फाइनलमा प्रवेश गरेको छ । पोखरा रङ्गशालामा शुक्रबार भएको अन्तिम प्रिक्वाटरफाइनल खेलमा पुलिसले विभागीय टोली सशस्त्र प्रहरी बलको एपिएफ क्लबमाथि २—० को सहज जित हासिल गर्दै अन्तिम आठमा स्थान बनाएको हो ।

पुलिसको जितमा मान बहादुर परियारले दुई गोलको योगदान दिनुभयो । उहाँले खेलको १९ र ७० औँ मिनेटमा गोल गरी खेलमा म्यान अफ दी म्याच समेत घोषित हुनुभयो ।

विभागीयमा सर्वाधिक सफलता हासिल गरेको पुलिससँग खेलको सुरुवातमै गोल खाएर दबाबमा परेको एपिएफले शुक्रवारको खेलमा पाएका केही अवसरलाई सदुपयोग गर्न नसक्दा आहा राराको पहिलो चरणको खेलबाट बाहिरियो ।

एपिएफका प्रशिक्षक सुमन श्रेष्ठले अन्तिम समयमा करिब ४ दिनको तयारीमा जुट्दा र खेलमा पाएका अवसर सदुपयोग गर्न नसक्दा हार्नु परेको बताउनुभयो । पुलिसका प्रशिक्षक चेतन घिमिरेले आहा रारा पोखरा गोल्डकपमा आफु खेलाडी हुँदा ह्याट्रिक पूरा गरेको स्मरण गर्दै अब प्रशिक्षणको जिम्मामा राम्रो सुरुवात भएको बताउनुभयो ।

अब पुलिसले चर्च ब्वाइज युनाइटेड फुटबल क्लबसँग यही माघ १६ गते खेल्ने भएको छ । भोलि (शनिबार) देखि क्वाटर फाइनलका खेलहरू हुने भएको छ । शनिबार हुने पहिलो क्वार्टर फाइनलमा थ्री स्टार क्लबले पाहुना टोली भुटानको पारो एफसीसंग भिड्ने सहारा क्लबका अध्यक्ष केशवराज बरालले बताउनुभयो ।