सुन तस्करी छानबिन आयोगले माओवादी उपाध्यक्ष कृष्णबहादुर महरासँग लियो बयान

काठमाडौंः नेकपा माओवादी केन्द्रका उपाध्यक्ष एवं पूर्वसभामुख कृष्णबहादुर महरासँग सुन तस्करी जाँचबुझ आयोगले बयान लिएको छ। सिंहदरबारस्थित सुनको अवैध पैठारी (तस्करी) नियन्त्रणसम्बन्धी जाँचबुझ आयोगमा महरासँग बयान लिइएको हो।

महरासँग आयोग पदाधिकारीले इलेक्ट्रिक चुरोट ‘भेप’मा लुकाएर सुन तस्करी भएको घटनामा संलग्नताबारे सोधीखोजी गरेका थिए।नेपाल प्रहरीको केन्द्रीय अनुसन्धान ब्युरो (सीआईबी) ले महराको बयान गराएर उनलाई प्रतिवादी कायम नगरी अनुसन्धान प्रतिवेदन बुझाएको थियो।

नेता महराले चिनियाँ नागरिकले दुबईबाट ल्याएको भन्सारमा रोकिएको ‘भेप’सुन छुटाउन तत्कालीन भन्सार प्रमुखलाई फोन गरेको बयान दिइसकेका छन्।

२०७९ पुस १० मा फ्लाई दुबईको फ्लाइट नम्बर एफजेड–०५८७ बाट नेपाल आएका चिनियाँ नागरिक लि हासोङले दुई वटा सुटकेसभित्र ७३ बट्टामा रहेको ७३० थान इलेक्ट्रिक सिगरेट (भेप) मा सुन ल्याएका हुन्। उक्त सुन विमानस्थल भन्सारमा अड्किएपछि माओवादी नेता महराको जोडबलमा छुटाइएको बताइन्छ।

सुन तस्करसँग सम्पर्क भएको देखिएपछि महरासँग समितिले बयान लिएको हो। सोही प्रकरणमा उनका छोरा राहुललाई सिआइबीले यसअघि नै पक्राउ गरिसकेको छ। हाल राहुल पुर्पक्षका लागि थुनामा छन्।