समर्थन फिर्ता लिँदैं बागमती सरकारबाटै बाहिरीए काँग्रेसका मन्त्रीहरु

काठमाण्डौंः सत्ता समिकरण परिवर्तन भएपछि बागमती प्रदेशका ६ जना मन्त्रीहरुले सामूहिक राजिनामा दिएका छन् । यो सँगै नेपाली काँग्रेसले संसदलाई दिएको विश्वासको मत पनि फिर्ता लिएको जनाएको छ ।

केन्द्रको समीकरण फेरिएसँगै प्रदेश सरकारबाट कांग्रेसका मन्त्रीहरू बाहिरिका हुन् । नेपाली कांग्रेस बागमती प्रदेश संसदीय दलका संसदीय दलका नेता तथा प्रदेशका अर्थमन्त्री बहादुरसिं लामा, उपनेता समेत रहेका प्रदेशको उद्योग वाणिज्य भूमि तथा प्रशासन मन्त्री रामकृष्ण चित्रकार, खानेपानी ऊर्जा तथा सिँचाइ मन्त्री तीर्थ लामा, स्वास्थ्य मन्त्री उत्तम जोशी, वन तथा वातावरण मन्त्री मसिना खड्का, संस्कृति पर्यटन तथा सहकारी मन्त्री पुकर महर्जनले मुख्यमन्त्री समक्ष राजिनामा दिएका हुन् । राजीनामा बुझाउने क्रममा खानेपानी ऊर्जा तथा सिँचाइ मन्त्री तीर्थ लामा भने उपस्थिति भएनन् ।

अर्थमन्त्री रहेका लामा विदेश भ्रमणमा रहेकाले काँग्रेसले आफूहरु सरकारको समर्थन फिर्ता लिने निर्णय ढीलोगरी लिएको हो । निर्णयपछि पार्टीले प्रदेश राजधानी बाहिर रहेका मन्त्रीहरुलाई हेटौँडा आउन निर्देशन दिइएको थियो । अर्थमन्त्री लामा र खानेपानी ऊर्जा तथा सिँचाइ मन्त्री तीर्थ लामा बुधबार नै स्वदेश फिर्ता भएका हुन् ।

बुधबार बिहान मात्रै उपनेता चित्रकार र प्रदेशका मुख्यमन्त्री शालिकराम जम्कट्टेल बिच सरकार छाड्ने विषयमा छलफल भएको थियो । बागमतीमा १२ सदस्यीय मन्त्रीपरिषद्मा प्रदेश सभाको ठुलो दलको हैसियतले कांग्रेसको भागमा ६ मन्त्रालय थिए ।

अर्थमन्त्रीमा बहादुरसिंह लामा र खानेपानी मन्त्री तीर्थबहादुर लामा २६ चैत २०७९ मा मन्त्री पदमा नियुक्त भएका थिए। वनमन्त्री खड्का, उद्योगमन्त्री चित्रकार, स्वास्थ्यमन्त्री जोशी र पर्यटन मन्त्री महर्जन ७ जेठ २०८० मा नियुक्त भएका थिए । संसदीय दलको उपनेता समेत रहेका चित्रकारले मन्त्रीहरूको राजीनामासँगै सरकारको समर्थन पनि फिर्ता लिने बताए । कांग्रेसले समर्थन फिर्ता लिएसँगै जम्कट्टेल नेतृत्वको सरकार अल्पमतमा परेको छ । सरकारबाट बाहिरिएसँगै कांग्रेसले बागमती प्रदेश सरकारको नेतृत्व गर्ने गरी समीकरण निर्माणमा अघि बढ्ने तयारी गरिएको उनले बताए ।

बजेट नै नभएको मन्त्रालयमा आफूले धेरै काम गर्न सकेको भन्दै उपनेता चित्रकारले आफ्नो कार्याकालमा सन्तुष्ट हुनेगरी काम गरेको बताए । उद्योग ग्राम स्थापनाको लागि संसदमा विधेयक दर्ता गरेको तर पास गराउन नपाएको भने दुख लागेको उनले बताए ।