प्रधानमन्त्री प्रचण्डलाई बधाई दिन बालुवाटार पुगे चिनिया राजदुत

काठमाण्डौं : नेपालका लागि चिनियाँ राजदूत छन् सोङ्ले प्रधानमन्त्री पुष्पकमल दाहाल प्रचण्डसँग भेटवार्ता गरेका छन् ।

प्रधानमन्त्री प्रचण्डले सदनमा तेस्रोपटक विश्वासको मत लिएको भोलिपल्ट आज (बिहीबार) चिनियाँ राजदूत सोङ्ले प्रधानमन्त्री प्रचण्डसँग भेट गरेका हुन् ।

सो भेटमा उनले प्रधानमन्त्रीलाई विश्वासको मत लिएकोमा बधाई दिनुको साथै दुई देशबीचको सहकार्यलाई बढावा दिने बताएको बालुवाटार स्रोतले जनाएको छ । यस्तै, नेपालमा आगामी बैशाखमा हुने लगानी सम्मेलनमा चीनबाट उच्चस्तरीय प्रतिनिधिहरुको सहभागी हुनेपनि उनले विश्वास दिलाएका थिए ।

काठमाडौंमा चक्रपथको स्तरोन्नतीको लागि द्रुत गतिमा काम गर्नेगरि तयारी थालिएको राजदूतको भनाई थियो । यस्तै, नेपाल र चीनबीच अहिले चार वटामात्रै व्यापारिक नाका सञ्चालनमा आएकोमा छिट्टै थप ७ वटा नाका सञ्चालनमा ल्याउन राजदूतले प्रतिबद्धता जनाएको प्रधानमन्त्री प्रचण्डको विदेश मामिला सल्लाहकार डा. रुपक सापकोटाले जानकारी दिए ।