‘ब्रेक सु’को सुनले प्रहरीलाई ‘ब्याकफायर’

काठमाण्डौंः ‘ब्रेक सु’मा लुकाएर त्रिभुवन अन्तर्राष्ट्रिय विमानस्थलबाट भएको सुन तस्करीको अनुसन्धानले प्रहरीलाई ‘ब्याकफायर’ भएको छ । राजस्व अनुसन्धान विभागको क्षमता र निष्पक्षतामाथि प्रश्न उठेपछि सरकारले प्रहरीलाई यसको अनुसन्धान जिम्मा लगाएको थियो । तर, सरकारले गठन गरेको जाँचबुझ आयोगले प्रहरीले बद्नियत राखेर अनुसन्धान गरेको प्रतिवेदन दिएपछि सिंगो प्रहरी संगठनकै छविमा दाग लागेको छ भने अनुसन्धानमा आबद्ध प्रहरी अधिकारी कारबाहीमा परेका छन् ।

पूर्वन्यायाधीश डिल्लीराज आचार्य नेतृत्वको जाँचबुझ आयोगले अनुसन्धानमा आबद्ध केन्द्रीय अनुसन्धान ब्युरो (सिआइबी) प्रमुख किरण बज्राचार्यसहित चार प्रहरी अधिकारीले अनुसन्धानमा निष्पक्षता नदेखाएको ठहर गरेको हो । जसअनुसार गृह मन्त्रालयले बज्राचार्यसहित एसपी सञ्जयसिंह थापा र डिएसपीद्वय दुर्गा दाहाल र रुगम कुँवरलाई कारबाही प्रक्रिया अघि बढाएको छ । जसले प्रहरी संगठन तरंगित बनेको छ ।

हचुवाकै भरमा प्रहरीमाथि कारबाही सिफारिस भएको र यस्तो प्रवृत्तिले भोलिका दिनमा अनुसन्धान अधिकृतहरूले कामै गर्न नसक्ने कतिपय प्रहरी अधिकारीको चिन्ता छ । गृह मन्त्रालयका अधिकारी भने जाँचबुझ आयोगले नै गल्ती देखाएको र गलत गर्नेहरू तत्कालै कारबाहीमा पर्ने सन्देश दिन प्रतिवेदनमा भएको सिफारिसअनुसार ‘एक्सन’ लिएको जनाएको छ ।

नेपाल प्रहरीका पूर्वएआइजी राजेन्द्रसिंह भण्डारी सुनसम्बन्धी जाँचबुझ आयोगले अनुमानका आधारमा कसैलाई कारबाही सिफारिस गर्न नहुने बताउँछन् । ‘यो घटनाले अहिले प्रहरीमा ह्याभोक सिर्जना भयो । जाँचबुझ आयोगले तथ्यगत प्रमाणका आधारमा मात्र कुनै सिफारिस गर्नुपर्छ । अभियुक्तले विनाप्रमाण आरोप लगाइदिएकै आधारमा कारबाही सिफारिस गर्दा भोलिका दिनमा अनुसन्धान अधिकृतले काम गर्न सक्दैनन्,’ उनले भने । नयाँपत्रिकाबाट