घर बास गुमाएकालाई तत्काल पुनर्वासको व्यवस्था मिलाउन सरकारको ध्यानाकर्षण गराउने एमालेको निर्णय

काठमाडौंः सत्तारुढ दल नेकपा एमालेले प्राकृतिक विपद्बाट घर बास गुमाएका १० हजार परिवारलाई छिटो भन्दा छिटो पुनः वासको व्यवस्था मिलाउन सरकारसँग आग्रह गरेको छ ।

बिहीबार पार्टी केन्द्रीय कार्यालय च्यासलमा बसेको पार्टीको सचिवालय बैठकले विपद्बाट प्रभावित परिवारलाई छिटो भन्दा छिटो पुनः वासको व्यवस्था मिलाउन सरकारको ध्यानाकर्षण गराउने निर्णय गरेको हो ।

बैठकपछि सञ्चारकर्मीहरुसँग कुरा गर्दै पार्टीका उपमहासचिव प्रदीप ज्ञवालीले सरकारले आफ्नो क्षमताले भ्याएसम्म विपद् प्रभावितहरूको उद्धार गरेको बताउनु भयो । उहाँले प्राकृतिक प्रकोप र सरकारको क्षमताको ग्यापले केही असहज परिस्थिति सिर्जना भएको बताउनु भयो । उहाँले सरकारले विभिन्न माध्यमबाट सुरक्षित स्थानमा रहन आग्रह गरेको र आम नागरिकहरूमा सजगताको कमी देखिएको बताउनु भयो ।

उहाँले भन्नुभयो, ‘सरकारले आफ्नो सामर्थ्यले भ्याएसम्म गरेको छ । प्राकृतिक प्रकोप र सरकारको भोलुमको बिचमा ग्याप त हुँदो नै रहेछ । हालै मात्र अमेरिकाको फ्लोरिडामा आँधीबाट आक्रान्त छ । सुविधा सम्पन्न देशमा पनि केही कमजोरी छन् । तर हामीले सरकारले इमानदारीपूर्वक काम गरेको छ की छैन भनेर हेर्दा नेपाली सेना, नेपाल प्रहरी, सशस्त्र प्रहरी बल, कर्मचारीहरू सबै खट्नुभएको छ । तर मौसम विज्ञहरूले मुसलधारे वर्षा हुने अनुमान गर्नुभएको थियो । त्यसलाई मध्यनजर गरेर सरकारले सूचना पनि सतर्क रहन दिएको हो । कति कुरामा नागरिकहरूको सजगतामा कमी पनि भयो । सरकार अझ बढी प्रभावकारी बनोस् । १० हजार परिवारले घर बास गुमाउनुभएको छ । उहाँहरूलाई छिटो भन्दा छिटो पुनः वासको जरुरी छ । त्यसपछि पुनः निर्माणको काम आउँछ ।’

उहाँले सरकारले अझ बढी सक्रिय भई विपद् प्रभावितहरूको पुनः वास र पुनर्निर्माणका लागि प्रभाकारी ढङ्गले काम गर्नुपर्ने बताउनु भयो ।