युइएफए नेसन्स लिग : जर्मनीको रोमाञ्चक जित

काठमाडौं : जर्मनीले युइएफए नेसन्स लिगमा शुक्रबार घरेलु टोली बोस्निया एन्ड हर्जगोभिनियाविरुद्ध २-१ को रोमाञ्चक जित दर्ता गरेको छ ।

जितसँगै तीन खेलमा सात अंक जोडेर जर्मनी  लिग ‘ए’ को सूमह २ को शीर्षस्थानमा उक्लिएको छ । पराजित हर्जगोभिनिया समान खेलबाट एक अंकका साथ पुछारमा छ ।

बिलीनो पोल्जी रंगशालामा जर्मनीलाई जित दिलाउन दुवै गोल डेनिज उन्डाभले गोल गरे । हर्जगोभिनियाका लागि इडेन जेकोले गोल फर्काए ।

खेलको ३०औं मिनेटमा उन्डाभको गोलमार्फत जर्मनीले अग्रता लिएको थियो । ६ मिनेटपछि उनैले टोलीको अग्रता दोब्बर बनाए ।

जेकोले ७०औं मिनेटमा गोल गर्दै हर्जगोभिनियालाई खेलमा फर्काउने प्रयास गरे पनि त्यो पर्याप्त बन्न सकेन ।

लिगअन्तर्गतकै अन्य खेलमा इस्टोनियाले अजरबैजानलाई ३-१, चेक रिपब्लिकले अल्बानियालाई २-०,  तथा टर्कीले मेन्टेनग्रो र युक्रेनले जर्जियालाई समान १-० ले पराजित गरे । यसैगरी नेदरल्यान्ड्सले हंगेरीसँग १-१ तथा वेल्सले आइसल्यान्ड र स्विडेनले स्लोभाकियासँग समान २-२ को बराबरी खेले ।