कोरोना अपडेटः शनिवार ५७ जना संक्रमित थपिए, १०३ जना डिस्चार्ज भएर घर फर्किए

काठमाण्डाैंः नेपालमा पछिल्लो २४ घण्टामा थप ५७ जना नयाँ कोरोना भाईरसका विरामी थपिएका छन् । देशभरका २७ वटा प्रयोगशालामा भएको पीसीआर परीक्षणमा ५७ जनामा कोरोना संक्रमण पोजेटिभ देखिएको हो ।

स्वास्थ्य तथा जनसंख्या मन्त्रालयको नियमित पत्रकार सम्मेलनमार्फत मन्त्रालयका प्रवक्ता प्रा.डा. जागेश्वर गौतमले देशभरका प्रयोगशालामा गरिएको परीक्षणमा शनिवार थपिएका ५७ जना विमारी सहित १७ हजार ५ सय २ जना संक्रमित पुगेको जानकारी दिए ।

यसैगरी सक्रिय संक्रमितको संख्या ५ हजार ८२५ रहेको र उनीहरुको उपचार भईरहेको छ । मन्त्रालयका प्रवक्ता डा. जागेश्वर गौतमका अनुसार प्रदेश नम्बर १ मा ७९, प्रदेश नम्बर २ मा १ हजार ८ सय ४४, बागमती प्रदेशमा ४ सय ११ र गण्डकी प्रदेशमा ४ सय ८ जना उपचाररत रहेका छन् । यस्तै प्रदेश नम्बर ५ मा ४ सय १४, कर्णाली प्रदेशमा ३ सय १७ र सुदूरपश्चिम प्रदेशमा २ हजार ३ सय ५२ जना संक्रमित उपचाररत रहेका छन् ।

नेपालमा पछिल्लो २४ घण्टामा थप १०३ जना कोरोना संक्रमित उपचारपछि निको भएर घर फर्केिएका छन् । योसँगै अस्पतालबाट डिस्चार्ज हुनेको संख्या ११ हजार ६३७ पुगेको छ । त्यस्तै कोरोनाका कारण नेपालमा अहिलेसम्म ४० जनाको मृत्यु भइसकेको छ ।

नेपाल कुल संक्रमितको संख्या १७ हजार ५ सय २ पुग्दा निको हुनेको संख्या ११ हजार ६ सय ३७ पुगेको छ । अहिलेसम्म पीसीआर विधिबाट ३ लाख ११ हजार ८ सय २९ जनाको कोरोना परीक्षण भएको छ । देशभरी २३ हजार २ सय ७५ जना क्वारेन्टिनमा रहेका छन् ।