असार २२, २०८२ आइतबार
July 6, 2025
युग खबर
२०७७ श्रावण १४, बुधबार
काठमाण्डाैंः सरकारले सहजीकरण गरेपछि सन्दीप लामिछाने क्यारेबियन प्रिमियर लिग (सीपीएल) खेल्न बिहीबार बिहान १० बजे वेष्ट इन्डिजका लागि त्यसतर्फ जाने भएका छन्।
सन्दीपका व्यवस्थापक रमण सिवाकोटीका अनुसार उनी भोली बिहीबार बिहान १० बजे कोरियन एयरलाइन्सको चार्टर उडानबाट जानेछन्। अमेरिका हुँदै उनी लिग हुने देश ट्रिनिडाड एण्ड टोबागो पुग्ने छन्। सन्दीप १ अगष्ट (शनिबार) त्यहाँ पुग्नेछन्।
सीपीएल आयोजक र उनको टीम जमैका तालावाहले सबै खेलाडीलाई शनिबारसम्म आइपुग्न भनेको थियो। सन्दीप आयोजकले भनेकै दिन पुग्ने भएका हुन्। खेलअघि सबै खेलाडी अनिवार्य १४ दिनको क्वारेन्टिनमा बस्नुपर्छ। सीपीएल १८ अगष्टदेखि शुरु हुँदैछ।
कोरोनाभाइरस महामारी रोकथामका नेपाल सरकारले बन्दाबन्दी घोषणा गरेपछि नियमित अन्तराष्ट्रिय उडान बन्द छन्। नेपालले १ भदौबाट मात्र उडान नियमित गर्ने भएपछि सन्दीप सीपीएल खेल्न जान नपाउने आशंका गरिएको थियो। उनका व्यवस्थापक सिवाकोटीसहितले पर्यटन तथा नागरिक उड्यनमन्त्री योगेश भट्टराई र खेलकुद मन्त्री जगत विकलाई भेटेर सहजीकरणका लागि आग्रह गरेका थिए।
सन्दीप जमैका तालावाहका मार्की खेलाडी पनि हुन्। उनी १ लाख ३० हजार अमेरिकी डलर (करीब रु.१ करोड ५६ लाख) मा अनुबन्ध भएका छन्। यो रकम कुनै पनि फ्रेन्चाइज लिगमा उनले पाएको सबैभन्दा बढी हो।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया