आत्मनिन्दा, गुटबन्दी र संगठनात्मक शिथिलता मुख्य चुनौती : कांग्रेस प्रवक्ता डा. महत

रुपन्देही, जेठ २५ । नेपाली कांग्रेसका प्रवक्ता तथा पूर्व अर्थमन्त्री डा. प्रकाशशरण महतले पार्टी संगठन गम्भीर कमजोरीतर्फ उन्मुख भएको चेतावनी दिँदै आत्मनिन्दा, गुटबन्दी र संगठनात्मक शिथिलता मुख्य चुनौती भएको बताएका छन्।

शनिबार नेपाली कांग्रेस अर्घाखाँची–रुपन्देही सम्पर्क समितिको दोस्रो अधिवेशनलाई सम्बोधन गर्दै डा. महतले “देश, जनता र पार्टी फर्स्ट अनि मात्र म भन्ने सोच विकास नगरे कांग्रेस अझै कमजोर बन्छ” भन्ने स्पष्ट सन्देश दिएका हुन्।

उनले पार्टीभित्रको नकारात्मक आत्मालोचना र आन्तरिक सशंकाको प्रवृत्तिले संगठन कमजोर बनाइरहेको उल्लेख गर्दै भने, “हाम्रै नेताहरूले मञ्चमै उभिएर ‘सबै भ्रष्टाचारी त हामी नै हौं’ भनेर भन्न थालेपछि जनतामा कस्तो सन्देश जान्छ?”

डा. महतले कांग्रेसको नीति र सिद्धान्त लोकतान्त्रिक मूल्य र समाजवादप्रतिको प्रतिबद्धतासहित बलियो रहेको जिकिर गरे। “निजी क्षेत्र उत्पादनको नेतृत्व लिने, राज्यले वितरणको – यही हाम्रो समाजवादी अवधारणा हो,” उनले भने।

तर संगठन निर्माणमा दीर्घकालीन सोचको अभाव, गुटबन्दी र अवसरवादले कांग्रेसलाई कमजोर बनाएको बताउँदै उनले थपे, “पपुलिजममा रमाउने प्रवृत्तिले दीर्घकालीन संस्था निर्माण गर्न सकेन।”

बसाइँसराइ र सूचना प्रविधिको विस्तारसँगै जनतासँगको सम्बन्ध गाँस्ने महत्वपूर्ण संरचना सम्पर्क समिति भए पनि पार्टीले यसको सदुपयोग गर्न नसकेको डा. महतको भनाइ थियो। उनले अर्घाखाँचीको उदाहरण दिँदै सम्पर्क समितिमा समावेशी प्रतिनिधित्व नहुनु गम्भीर कमजोरी भएको औंल्याए।

निर्वाचन प्रणालीले बहुमत असम्भव बनाएको उल्लेख गर्दै उनले “सत्तामा जानु र नीति कार्यान्वयन गर्नु पार्टीको कर्तव्य हो, क्लब होइन,” भन्दै गठबन्धनलाई यथार्थपरक मान्यता दिनुपर्ने धारणा राखे।

उहाँले हालैको राष्ट्र बैंक गभर्नरको नियुक्तिमा सभापति शेरबहादुर देउवाको अडानलाई उदाहरण दिँदै कांग्रेसले आफ्ना मूल्य नछोडेको स्पष्ट पारे।

अनुशासनबारे भारतीय जनता पार्टीको उदाहरण दिँदै डा. महतले कांग्रेसमा पनि कडा अनुशासन र उद्देश्यकेन्द्रित नेतृत्व विकासको खाँचो रहेको बताए। “अनुशासन समिति छ, तर कार्यान्वयन शून्यजस्तै छ,” उनको टिप्पणी थियो।

नयाँ पुस्तामा ‘पार्टीबाट के पाइन्छ?’ भन्ने सोच हावी भइरहेकोमा चिन्ता व्यक्त गर्दै उनले “गुटगत राजनीति त्यागेर पार्टीको न्यूनतम मूल्य र सिद्धान्त बुझ्ने साथीहरू एकजुट हुनुपर्छ,” भन्ने आह्वान गरे।

कार्यक्रममा अन्य नेताहरूले समेत पार्टीभित्र अनुशासन, समावेशी संरचना, र सशक्त संगठन निर्माणको आवश्यकता औंल्याएका थिए।