नेपालमा थप ८१८ जनामा संक्रमण पुष्टि- मृतकको संख्या १४९ पुग्यो

काठमाण्डौः आइतबार ८ हजार २६ जनाको मात्रै पीसीआर परीक्षण भएको छ। स्वास्थ्य तथा जनसंख्या मन्त्रालयले चारवटा प्रयोगशालाको रिपोर्टमा प्राविधिक समस्या देखिएकाले कोरोना नतिजा सार्वजनिक नगरिएको जनाएको छ।

शनिबार भन्दा पाँच हजार कम परीक्षण गर्दा झण्डै दुई सय बढीमा संक्रमण पुष्टि भएको छ । काठमाण्डौं उपत्यकामा मात्रै १ सय ६६ जनामा संक्रमण पुष्टि भएको छ। त्यस मध्ये काठमाडौंका मात्रै १ सय २६ जना रहेका छन् ।

पर्सामा १ सय ३९, सर्लाहीमा ९१ र मोरङमा ५० जनामा संक्रमण पुष्टि भएको छ। उपत्यकाका भक्तपुरमा २८ र ललितपुरमा १२ जनामा संक्रमण पुष्टि भएको छ ।

आइतबार देशभर गरी ८ सय १८ जनामा संक्रमण पुष्टि भएको छ। थपिएका संक्रमितमा ५ सय ९८ पुरुष र २ सय २० महिला छन्। नेपालमा संक्रमित संख्या ३१ हजार ९ सय ३५ पुगेको छ। बितेको २४ घण्टामा २ सय ८१ जना डिस्चार्ज भएका छन् । यो सहित संक्रमित निको हुनेको संख्या १८ हजार ६ सय ३१ जना पुगेको छ।

आइतबार थप तीन जनाको मृत्यु भएको छ। यो सहित संक्रमणबाट मृत्यु हुनेको संख्या १४९ पुगेको छ । सक्रिय संक्रमित संख्या भने १३ हजार १ सय ५५ पुगेको छ। त्यसमध्ये ९ हजार २ सय १२ संस्थागत र तीन हजार ९ सय ४३ जना होम आइसोलेसनमा छन् ।