नेपाललाई छिट्टै सडक बालबालिका मुक्त घोषणा गर्ने : मन्त्री सुडी

काठमाडौँ । महिला, बालबालिका तथा ज्येष्ठ नागरिक मन्त्री नवल किशोर साह सुडीले नेपाललाई छिट्टै नै सडक बालबालिका मुक्त घोषणा गर्ने गरी काम भइरहेको बताउनुभएको छ ।

मन्त्रालयमा आज आयोजित पत्रकार सम्मेलनमा, मन्त्री सुडीले सडक बालबालिका मुक्त नेपाल घोषणाको अन्तिम चरणमा रहेको, महिला सशत्तिकरण र विभेद अन्त्यका लागि विभिन्न संघसंस्थाहरुको सहकार्यमा उल्लेखनीय प्रगति हुँदै गएको बताउनुभयो ।

मन्त्री सुडीले सडक बालबालिका मुक्त अभियान सञ्चालनका लागि सडक बालबालिका विशेष संरक्षण निर्देशिका २०८२ स्वीकृत भएको तथा बालबालिका सम्बन्धी ऐन, २०७५ र मानव बेचबिखन तथा ओसारपसार नियन्त्रण ऐन, २०६४ लाई संशोधन गर्न प्रतिनिधिसभामा विधेयक दर्ता गरिएको जानकारी दिनुभयो ।

मन्त्री सुडिले आफ्नो कार्यकालको एक वर्षमा देशका विभिन्न अप्ठेरोमा परेका १३२ जना गर्भवती र सुत्केरी महिलाको हवाइ उद्धार गरिएको तथा महिला हिंसा विरुद्ध सचेतना कार्यक्रम सञ्चालन गरी जनचेतना जगाउने खालका कार्यक्रमलाई विशेष रुपमा अघि बढाइएको जानकारी गराउनुभयो ।

त्यसैगरी, अपाङ्गता भएका व्यक्तिका लागि राष्ट्रिय नीति कार्यान्वयन कार्ययोजना मस्यौदा तयार पारिएको र समाज कल्याण परिषद् मार्फत एकसाठि (६१) अर्ब सन्तानब्बे (९७) करोड रुपैयाँ बराबरको वैदेशिक सहयोग स्वीकृत भएको पनि पत्रकार सम्मेलनमा मन्त्री सुडिले जानकारी दिनुभयो ।

मन्त्री सुडीले महिलाको सशक्तीकरणसँगै बालबालिका, लैङ्गिक तथा यौनिक अल्पसङ्ख्यक, अपाङ्गता भएका व्यक्ति र ज्येष्ठ नागरिकको अधिकारका लागि तीन तहका सरकारबीच समन्वयमा साझा प्रयास आवश्यक रहेको त्यस अवसरमा जोड दिनुभयो ।