श्रावण १, २०८२ बिहिबार
July 17, 2025
युग खबर
२०७७ भाद्र १२, शुक्रबार
काठमाडौंः सत्तारुढ नेपाल कम्युनिष्ट पार्टी (नेकपा) को सचिवालय बैठक स्थगित भएको छ।
शनिबारको लागि बोलाइएको बैठक भदौ १८ गतेसम्मको लागि स्थगित भएको हो । प्रधानमन्त्री एवम् नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच शुक्रबार बालुवाटारमा डेढघण्टासम्म भएको छलफलबाट बैठक स्थगित गर्ने निर्णय भएको हो।
सचिवालय सदस्यद्वय उपप्रधान एवं रक्षामन्त्री ईश्वर पोखरेल र गृहमन्त्री रामबहादुर थापा बादल आइसोलेसनमा बस्नुपर्ने कारण देखाउँदै बैठक स्थगित भएको सचिवालयका एक सदस्यले बताए।
यसअघि पार्टीका वरिष्ठ नेता माधवकुमार नेपालको पीएसओसहित ९ जना सुरक्षा गार्डलाई कोरोना सङ्क्रमण देखिएपछि सचिवालयको बैठक १३ गतेलाई तय भएको थियो । नेता नेपाल झन्डै सातदिन होम क्वारेन्टिनमा बसेको थिए ।
बैठकमा नेकपा कार्यदलले गत शनिबार बुझाएको प्रतिवेदनमाथि छलफल हुने कार्यसूची तय भएको थियो । पार्टीभित्र विवाद उत्पन्न भएपछि असार १० गतेबाट सुरु भएको स्थायी कमिटी बैठक पटक पटक स्थगित हुँदै आएको छ ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया