कर्मचारीबीचको विभेद अन्त्य गर्न प्राथमिकता दिने मन्त्री न्यौपानेको प्रतिबद्धता

तनहुँ, साउन ३० । सङ्घीय मामिला तथा सामान्य प्रशासनमन्त्री भगवती न्यौपानेले कर्मचारीबीचको विभेद अन्त्यलाई आफ्नो पहिलो प्राथमिकता रहेको बताउनुभएको छ।

शुक्रबार गृह जिल्ला तनहुँको बन्दीपुर गाउँपालिकामा आयोजित कर्मचारी भेटघाट कार्यक्रममा मन्त्री न्यौपानेले सुगम स्थानमा निरन्तर बस्ने र दुर्गममा मात्र खटिरहनुपर्ने अवस्थाको अन्त्य गर्न कदम चालिने स्पष्ट पार्नुभयो।

उहाँले चाकडी संस्कृतिको अन्त्य गर्दै न्यायको आधारमा सरुवा र बढुवाको प्रक्रिया अघि बढाइने प्रतिवद्धता जनाउनुभयो। साथै, भदौसम्म पालिकामा निमिक्त प्रमुख प्रशासकीय अधिकृतको भरमा सञ्चालन हुने अवस्था समाप्त गरी नियमित संरचना सुनिश्चित गरिने उहाँको भनाइ छ।