दक्षिण अफ्रिकाका पूर्ब राष्ट्रपति ज्याकब जुमाद्धारा प्रहरी समक्ष आत्मसमर्पण

काठमाण्डौंः दक्षिण अफ्रिकाका पूर्व राष्ट्रपति ज्याकब जुमाले प्रहरी समक्ष आत्मसमर्पण गर्नुभएको छ । अदालतको अवहेलना मुद्दामा उहाँलाई १५ महिनाको कैद सजाय सुनाइएको थियो । प्रहरीले सम्पर्कमा नआए गिरफ्तार गर्ने भनिरहँदा ७९ वर्षीय जुमाले आत्मसमर्पण गर्नुभएको हो ।

बीबीसीका अनुसार बुधबार नै उहाँलाई क्वाजुलु नाटल प्रान्तस्थित आफ्नो निबास नजिकको कारागार चलान गरिएको छ । भ्रष्टाचारको आरोप खेपेका जुमालाई गत् साता अदालतले उपस्थित हुन आदेश दिएको थियो । अदालतको सोधपूछ गर्ने सम्बन्धी आदेशको पालना नगर्दा उहाँलाई १५ महिना जेल सजाय तोकिएको थियो ।

दक्षिण अफ्रिकामा पूर्व राष्ट्रपति जेल गएको यो पहिलो अवसर हो । निर्णय गर्ने प्रकृयालाई प्रभावित पार्न ब्यापारीहरुसँग साँठगाँठ गरेको पूर्व राष्ट्रपति जुमामाथि आरोप लगाइएको छ । तर उहाँले उक्त आरोप राजनीतिबाट पूर्बाग्रही भएको दाबी गर्दै आउनुभएको छ ।

सन् २०१८ मा जुमालाई उहाँ आबद्ध रहेको दल अफ्रिकी नेशनल कँग्रेसले राष्ट्रपतिको जिम्मेवारीबाट बाहिरिन लगाएको थियो । – एजेन्सी