एमाले बैठक : विधान मस्यौदा प्रतिवेदनमाथिको छलफल सकियो

काठमाण्डौंः नेकपा (एमाले) को जारी केन्द्रीय कमिटी बैठकमा राजनीतिक, साङ्गठनिक र विधान मस्यौदा प्रतिवेदनमाथिको छलफल सकिएको छ ।

ललितपुरस्थित तुल्सीलाल स्मृति प्रतिष्ठानमा जारी बैठकमा आज १० समूहमा विभाजित टोली नेताले समूहगत छलफलपछि आ–आफ्ना धारणा प्रस्तुत गर्नुभएसँगै बैठक आइतबार ११ बजेसम्मका लागि स्थगित गरिएको हो । एमालेका प्रचार विभाग प्रमुख योगेश भट्टराईले टोली नेताबाट समाजवादको आधार निर्माणलाई पार्टीको कार्यदिशाको रूपमा अगाडि बढाउनुपर्दछ भन्ने सुझाव आएको बताउनुभयो ।

“जनताको बहुदलीय जनवादको मार्ग निर्देशनमा संविधान जारी हुँदासम्म एउटा क्रान्ति हासिल गरेको छौँ । अब नेपालीका समाजमा रहेका सामाजिक र आर्थिक पछौटेपनलाई रुपान्तरण र क्रान्तिका उपलब्धिलाई संस्थागत सुदृढ गर्दै समाजवादको आधार निर्माण गर्ने कुरालाई पार्टीको कार्यदिशाका रूपमा अगाडि बढाउनुपर्दछ भन्ने सुझाव आएको छ”, उहाँले भन्नुभयो ।

यस्तै टोली नेताले कम्युनिष्ट आन्दोलन एकता विभाजनको कालखण्डबाट गुज्रिँदै आएको र एमाले एकताको प्रतीक रहेकाले विभाजित भएको कम्युनिष्ट आन्दोलनलाई एकताबद्ध बनाउने ऐतिहासिक कार्यभार एमालेले पूरा गर्नुपर्दछ भन्ने सुझाव दिएको उहाँको भनाइ रहेको छ । “कम्युनिष्ट आन्दोलनलाई एकताबद्ध बनाउन सबै कम्युनिष्ट पार्टीसँग छलफल, सम्वाद गर्नुपर्दछ भन्ने सुझाव पनि छ”, नेता भट्टराईले भन्नुभयो, “कम्युनिष्ट आन्दोलनमा देखिएको एउटा सङ्कृणता, गुटवादी प्रवृतिमाथि सङ्घर्ष गर्दै एउटा कम्युनिष्ट पार्टी बनाउने कार्यदिशा एमालेको हुनुपर्दछ भन्ने छ ।”

यस्तै टोली पार्टीमा प्रत्येक तहमा युवाको नीति निर्माण तहदेखि कार्यन्वयनमा युवाको सहभागितामा स्थानीय तहदेखि केन्द्रीय तहसम्म बढाउनुपर्नेमा समेत सुझाव आएको उहाँको भनाई रहेको छ । उहाँका अनुसार पार्टीलाई बढीभन्दा बढी महिला, दलित, अल्पसङ्ख्यक, मधेसी र जनजातिको सहभागिता बढाउँदै पार्टीलाई राष्ट्रिय चरित्रको पार्टी बनाउने पनि सुझाव टोली नेताले दिएका छन् । उहाँले सङ्घीय संरचनाअनुसार सात जना थप्ने सुझाव आएको बताउनुभयो ।

सत्तरी वर्षे उमेरहद पनि कायम गरेर जानुपर्ने अधिकांशको सुझाव रहेको नेता भट्टराईले जानकारी दिनुभयो । यस्तै टोली नेताले पार्टीको सम्पूर्ण ध्यान पार्टी निर्माणमा केन्द्रित गर्नुपर्ने सुझाव पनि दिएको उहाँले बताउनुभयो । आगामी स्थानीय निर्वाचनमा पहिलेभन्दा बढी र संसद् र प्रदेश निर्वाचनमा बहुमत ल्याउने गरी जानुपर्ने सुझाव दिएका छन् ।

आइतबार बस्ने बैठकले प्रतिवेदनमा आएका सुझावको आधारमा राजनीतिक प्रतिवेदनमा अध्यक्ष केपी शर्मा ओली, साङ्गठनिक प्रतिवेदनमा महासचिव ईश्वर पोखरेल र विधान मस्यौदा प्रस्तावमा उपमहासचिव विष्णुप्रसाद पौडेलले जवाफ दिनुहुने छ । उहाँहरूले जवाफ दिएपछि बैठकले प्रतिवेदन पारित हुने नेता भट्टराईले बताउनुभयो ।

शुक्रबारदेखि शुरु भएको बैठकमा भूगोलका सात प्रदेशका सात तथा जनसङ्गठन, केन्द्रीय विभाग र विशेष प्रदेशका तीन गरी १० समूहले आज तीनवटै प्रतिवेदनमाथि समूहगत छलफल गरेका थिए । आइतबार प्रतिवेदन पारित गरिएपछि यही असोज १५ देखि १७ गतेसम्म हुने विधान महाधिवेशनमा ती दस्तावेश पेश हुनेछन् । रासस