कांग्रेस केन्द्रीय कार्यसम्पादन समितिको बैठक अपरान्ह २ बजे बस्दै

काठमाडौंः नेपाली कांग्रेस केन्द्रीय कार्यसम्पादन समितिको बैठक आज (शुक्रबार) पनि बस्ने भएको छ। समिति गठन भएपछि बिहीबार पहिलोपटक बसेको बैठक आज पनि निरन्तर जारी रहने भएको हो । बैठक दिउँसाे २ बजेदेखि पार्टी केन्द्रीय कार्यालय सानेपामा बस्दैछ।

बैठकमा खासगरी स्थानीय तहको निर्वाचन, एमसीसी, पार्टीका भातृ तथा शुभेच्छुक संस्थाहरुको महाधिवेशन लगायतका विषयमा छलफल गर्ने अजेन्डा रहेको छ।

बैठकमा नेताहरूको बोल्ने क्रम नसकिएकाले आज पुनः बस्न लागेको प्रवक्ता प्रकाशशरण महतले जानकारी दिए। बैठकको पहिलो दिन बोल्ने सदस्यहरुले एससीसी परियोजना, स्थानीय तहको निर्वाचन, भातृ तथा शुभेच्छुक संस्थाको अधिवेशन लगायतका विषयमा आ–आफ्नो धारणा राखेका थिए।

पहिलो दिनको बैठकमा गोपालमान श्रेष्ठ, डा शशांक कोइराला, सुनील थापा, उमा रेग्मी विजयकुमार गच्छदारलगायत १२ जना नेताहरुले आफ्नो धारणा राखेका थिए। ‘नेताहरुको बोल्ने क्रम सकिएको छैन। भोलि पनि केही नेताहरुले आफ्नो धारणा राख्नुहुन्छ,’ प्रवक्ता महतले भने, ‘शुक्रबार नै बैठक सक्ने तयारी छ।’

बैठकमा अधिवेशन बाँकी रहेका १६ जिल्ला र केही क्षेत्रीय समितिको अधिवेशनका विषयमा पनि छलफल भइरहेको छ। ‘अधिवेशन बाँकी रहेका ठाउँमा छिटो भन्दा छिटो अधिवेशन सक्नुपर्ने भन्ने नै छ,’ प्रवक्ता महतले थपे, ‘निर्वाचन समितिले काम गरिरहेको छ। स्थानी यतहको निर्वाचन अघि नै सम्पन्न भए सहज हुन्छ।’ हाल कांग्रेसको केन्द्रीय कार्यसम्पादन समिति ३७ सदस्ययीय छ।