खुमबहादुर खडकाको स्मृतिमा भलिवल प्रतियोगिता

काठमाण्डौंः दंगाली नेता खुमबहादुर खडकाको स्मृति दिवसको अवसरमा नेपाली कांग्रेस दाङको आयोजनामा दाङमा प्रथम खुमबहादुर खड्का स्मृति पुरुष भलिवल प्रतियोगिता –२०७८ सुरु भएको छ ।

प्रतियोगिताको नेपाली कांग्रेसका केन्द्रीय सदस्य तथा पूर्वमन्त्री दीपक गिरीले उद्घाटन गरेका हुन । जिल्लाको घोराहीस्थित सहिद मञ्चमा आयोजित प्रथम खुमबहादुर खड्का स्मृति पुरुष भलिबल प्रतियोगिता उद्घाटन गर्दै गिरीले कांग्रेस नेता खुमबहादुर खड्काको सम्झनालाई चीरस्थायी बनाउन यस्ता खेलकुद कार्यक्रमले सहयोगी हुने बताए । कांग्रेसको राजनीतिक इतिहासमा नेता खुमबहादुरको योगदानलाई खेलकुद माध्यमबाट सदैव जीवन्त बनाइराख्नु पर्ने बताए । उनले खेलले शरीरलाई स्वस्थ, फुर्तिलो र निरोगी बनाउन महत्वपूर्ण भूमिका खेल्ने बताए ।

कार्यक्रममा केन्द्रीय सदस्य कृष्णकिशोर घिमिरेले खेलकुद स्वास्थ्यका लागि अत्यन्त फाईदाजनक रहेको र खेललाई कांग्रेसले उच्च प्राथमिकता दिने सन्देश प्रतियोगिताले दिएको बताए । लुम्बिनी प्रदेशका ऊर्जा जलस्रोत तथा सिंचाइमन्त्री अर्जुनकुमार श्रेष्ठले खेलले व्यक्तिको शारीरिक मात्र नभइ राष्ट्रको पहिचान पनि गराउन बताए । मन्त्री श्रेष्ठले भने, ‘स्वर्गीय नेता खड्काका स्मृतिमा गरिएको भलिवल प्रतियोगिता कार्यक्रमले उनप्रति थोरै भए पनि न्याय गर्न सकेको महसुस भएको छ ।

नेपाली कांग्रेस लुम्बिनी प्रदेशका उप सभापति राजु खनालले खेलले सबैलाई जोड्ने भन्दै कांग्रेसलाई एकताबद्ध बनाई राख्न र युबा पङ्क्तिलाई गोलबद्ध गराउन पार्टीले राख्ने यस्ता कार्यक्रमले महत्वपुर्ण भूमिका रहने चर्चा गरे ।

प्रतियोगितामा दाङका दशवटै पालिकाहरुको सहभागिता रहेको छ । नेपाली कांग्रेसका नेता एवं पूर्वमन्त्री खुमबहादुर खड्काको स्मृतिमा फागुन १६ गतेदेखि २२ गतेसम्म भलिवल प्रतियोगिता सन्चालन हुनेछ ।

खुमबहादुर खड्का स्मृति खेलकुद समितिका संयोजक तथा जिल्ला सहसचिव राजु आचार्यले सर्वाधिक राशीको भलिबल प्रतियोगिता जिल्लामै पहिलो पटक हुन थालेको बताए । उनले खेल उत्साह पूर्वक तवरले सञ्चालन भइरहेको बताए । जिल्लामा सवैभन्दा ठूलो धन राशीको प्रतियोगिताको बिजेता टिमले नगद २ लाख रुपैया र उपबिजेता हुने टिमले नगद १ लाख रुपैयासहित शिल्ड, मेडल र प्रमाणपत्र प्राप्त गर्नेछ । प्रतियोगितामा उत्कृष्ठ खेल प्रदर्शन गर्ने एक जना खेलाडीलाई नगद पाँच हजार एक सय रुपैया पुरस्कार प्रदान गरिने छ ।

लिककम नकआउटको आधारमा खेलाइने खेलमा प्रत्येक टिमले दुई जना जिल्ला बाहिरका खेलाडीहरुलाई सहभागी गराउन पाउने व्यवस्था गरिएको खुमबहादुर खड्का स्मृति खेलकुद समितिका संयोजक आचार्यले बताए । प्रतियोगिताले खेलाडीहरुको हौसल्ला बढाउनेदेखि गाउँस्तरमा रहेका खेलाडीहरुको प्रतिभा पहिचानका लागि समेत सहयोग पुर्‍याउने अपेक्षा गरिएको छ ।

काग्रेस दाङ जिल्लाका सभापति शंकरप्रसाद डाँगीको सभापतित्वमा भएको कार्यक्रममा क्षेत्र नं. २ का क्षेत्रीय सभापति भीमप्रकाश खड्का, दाङ जिल्ला पूर्व पार्टी सभाति वीरकेशरी गौतम, महाधिवेशन प्रतिनिधि सावित्रा राणा लगायत शुभकामना मन्तव्य राखेका थिए ।

जिल्ला उपसभापति कमानसिं भारतीको स्वागत मन्तव्यबाट सुरु भएको कार्यक्रममा उपसभापति गिरिराज सुवेदीले धन्यवाद ज्ञापन गरेका थिए । सचिव अर्जुन योगी र बालिका लम्सालले कार्यक्रमको सहजीकरण गरेका थिए ।