ओमानविरुद्ध नेपाल बलिङ गर्दै, करणले लिए दुई विकेट

काठमाडौँ । तीन राष्ट्र सम्मिलित आइसिसी विश्वकप लिग–दूई त्रिकोणात्मक शृङ्खला अन्तगर्त पहिलो खेलमा नेपालले अहिले ओमानसँग खेलिरहेको छ । टियु त्रिकेट मैदानमा टस जितेर नेपालले पहिले फिल्डिङ गरेको हो ।

नेपालका लागि करण केसीले दुई विकेट दिलाएका छन् । उनले ओमानका खबार अली र जतिन्दर सिंहलाई आउट गरेका हुन् । सात ओभरको खेल सकिँदा ओमानले मात्र १९ रन बनाउन सकेको छ ।

नेपालमा पहिलोपटक भएको यो प्रतियोगितामा सहभागी हुन ओमान र अमेरिकाको टिम नेपाल आएको छ । माघ २९ गतेसम्म चल्ने त्रिकोणात्मक शृखंलमा कूल ६ खेल हुनेछन । नेपालले दोस्रो खेल अमेरिकासँग माघ २५ गते शनिबार खेल्नेछ । यस्तै तेस्रो खेलमा नेपालले ओमानसँग माघ २६ र चौथो तथा अन्तिम खेल नेपालले अमेरिकासँग माघ २९ गते खेल्ने तालिका रहेको छ ।

ओमान २०१२ पछि पहिलो पटक नेपाल आएको हो । सन २०२३ को एकदिवसीय विश्वकपको रोडम्यापको रुपमा समेत रहेको यस विश्वकप लिग–२ मा नेपालको यो पहिलो शृङ्खला हो । यसअघि नै दुई सिरिज खेलिसकेको अमेरिका ८ खेलबाट १२ अंक जोड्दै अंक तालिकामा शीर्ष स्थानमा छ । ओमान ८ अंकसहित चौथो स्थानमा छ ।

सन् २०१८ मा पहिलो पटक एकदिवसीय मान्यता पाएपछि नेपालले घरेलु मैदानमा एकदिवसीय शृङ्खला खेल्न लागेको यो पहिलोपटक हो भने समग्रमा नेपालको तेस्रो एकदिवसीय शृङ्खला हो ।

पहिलो पटक सन २००८ को डिभिजन पाँचमा आमनेसामने भएका अमेरिका र नेपाल ११ पटक एकदिवसीयमा आमनेसामने भएका छन् । जसमा नेपालले ५ पटक जितेको छ भने अमेरिकाले ३ खेल जितेको छ । ३ खेल भने नतिजा बिहीन भएका छन् ।