चिकित्सक संघमा नयाँ नेतृत्व, अध्यक्षमा डा.कार्की

काठमाडौं । देशभरिका डाक्टरहरुको छाता संगठन नेपाल चिकित्सक संघमा नयाँ नेतृत्व चयन भएको छ। दुई दिन भएको निर्वाचनको प्राप्त ताजा परिणामअनुसार अध्यक्षमा डा. लोचन कार्की विजयी भएका छन्।

४ हजार १ सय ११ मत ल्याएर निर्वाचित उनी लोकतान्त्रिक समूहका हुन्। डा.कार्की वर्तमान कार्यसमितिका महासचिव हुन्। मंगलबार बिहान सकिएको मत परिणामअनुसार कार्कीका प्रतिद्वन्द्वी डा।पुष्पमणि खरालले १९७९ मत पाएका छन्।

उपाध्यक्षमा डा. अनिल कार्की, बरिष्ठ उपाध्यक्ष्मा डा.विश्वप्रसाद श्रेष्ठ र महासचिवमा डा.बद्री रिजाल विजयी भएको निर्वाचन समिति स्रोतले जनाएको छ।

संघको २८ औं कार्यकारिणी समिति चयनका लागि भएको निर्वाचन परिणाम मंगलबार दिउँसो सार्वजनिक गरिँदैछ। दुई चरणमा गरी देशव्यापी रुपमा भएको मतदानमा ६ हजार १५१ मत खसेको थियो।

फागुनमा हुने सम्मेलनपछि नयाँ कार्यसमितिलाई जिम्मेवारी हस्तान्तरण हुनेछ। निर्वाचन समिति स्रोतका अनुसार सदस्यहरुमा डा.रितेश थापा विजयी भएका छन्। उनले ३ हजार ७ सय १७ मत पाएका छन्। उनले पाएको मत सदस्यहरूमध्ये सबैभन्दा बढी हो।