नोकियाले ल्यायो मोबाइलमै इयरबड राख्न र चार्ज गर्न सकिने फोन

काठमाण्डौः मोबाइल निर्माता कम्पनी एचएमडी ग्लोबल बार फोनको मामलामा नयाँ होइन । एचएमडी ग्लोबलले रेट्रो डिजाइनदेखि नोकिया १०५ जस्तो सस्तो फोन उपलब्ध गराउँदै आएको छ ।

अहिले भने कम्पनीले एकसाथ तीन ओटा नयाँ फिचर फोन र एउटा लो-इन्ड ट्याब्लेट घोषणा गरेको छ । तर, त्यसमध्येको एक नोकिया ५७१० एक्सप्रेस अडियो (Nokia 5710 XpressAudio) ले धेरैको ध्यान खिचेको छ ।

यो फोन अगाडिबाट हेर्दा पुरानो बारफोन (बटन भएको फोन) जस्तै देखिन्छ । तर, फोनको पछाडिको भागमा रहेको डिजाइनले धेरैलाई आकर्षित गरेको छ । फोनको पछाडि भागमा माथिपट्टि छुट्टै प्यानल रहेको छ ।

जसलाई तल सार्दा इयरबड राख्ने ठाउँ देख्न सकिन्छ । यसको अर्को राम्रो पक्ष भनेको यसबाट इयरबड चार्ज समेत गर्न सकिन्छ । यसमा १,४५० एमएएच क्षमताको ब्याट्री रहेकाले ब्याट्रीको सन्दर्भमा धेरै कुरा अपेक्षा गर्न सकिँदैन ।तर, यो बार फोन भएकाले त्यति धेरै चार्ज खपत पनि गर्दैन । त्यस्तै इयरबडमा साना ब्याट्री रहनुले पनि फोनको ब्याट्री त्यति खपत नहोला भन्ने अनुमान लगाउन सकिन्छ । किनभने अडियोको भाग इयरबडले सम्हालेको हुन्छ ।

त्यस्तै एचएमडीले यसमा निकाल्न मिल्ने ब्याट्री रहेको जनाएको छ । यो फोनलाई लगातार प्रयोग गरियो भने छ घण्टा र साधारण प्रयोग अर्थात् फोन गर्ने कार्य मात्र गरेको सन्दर्भमा २० दिनसम्म ब्याट्री टिक्ने बताइएको छ । फोनमा २.४ इन्चको क्यूभीजीए स्क्रिन, ३.५५ एमएम पोर्ट, ५.० ब्लुटुथ फिचर दिइएको छ । त्यस्तै यो फोनमा १२८ एमबी सम्मको एक्सपान्डेबल स्टोरेज रहेको छ ।

अडिओ कन्ट्रोल बटन, एफएम रेडियो सपोर्ट, माइक्रो यूएसबी पोर्ट, भीजीए क्वालिटीको क्यामेरा भएको यो फोन एस३० अपरेटिङ सिस्टममा सञ्चालित हुनेछ । यो फोनले ३२ जीबिसम्मको एक्सटर्नल मेमोरी सपोर्ट गर्ने भएकाले म्युजिकका लागि पर्याप्त हुनेछ ।

एचएमडीले नोकिया ५७१० एक्सप्रेस अडियोको मूल्य ८९ अमेरिकी डलर (११ हजार रुपैयाँ) राखेको छ । यो फोन कहिलेदेखि बजारमा उपलब्ध हुन्छ भन्ने कुरा भने कम्पनीले हालसम्म खुलाएको छैन । टेकपाना