गाँजा खेतीलाई वैधता प्रदान गर्न माग गर्दै निजी विधेयक दर्ता

काठमाडौँ । नेपालमा गाँजा खेतीलाई कानूनी मान्यता प्रदान गर्नु पर्ने मागसहित सांसद शेरबहादुर तामाङ्गले प्रतिनिधिसभामा निजी (गैरसरकारी) विधेयक दर्ता गराएका छन् ।

पूर्व कानून मन्त्रीसमेत रहेका तामाङ्गले सोमबार संसदको विधेयक शाखामा गाँजा खेतीलाई वैधता प्रदान गर्नु पर्ने तर्कसहितको निजी विधेयक दर्ता गरेका हुन् ।
उनले विदेशमा रहेका नेपालीलाई स्वदेश फर्काउन तथा आर्थिक विकासको ढोका खोल्नका लागि गाँजा खेतीलाई वैधता प्रदान गर्नु पर्ने तर्क गरेका छन् ।

सांसदले गैरसकरारी विधेयक दर्ता गराउन पाउने संवैधानिक व्यवस्था अनुसार तामाङ्गले सोमबार गाँजा खेतीलाई वैधता प्रदान गर्नु पर्ने तर्कसहित विधेयक दर्ता गराएका हुन् ।

नेपालमा लागु औषध निवारण ऐन, २०३३ ले गाँजा खेतीलाई निशेष गरेको छ । तर संसदमा पछिल्लो केही समयदेखि गाँजा खेतीको पक्षमा सांसदहरुले आवाज उठाउँदै आएका छन् ।
यसअघि नेकपाका सांसद विरोध खतिवडाको नेतृत्वमा ४६ सांसदले गाँजा खेतीलाई वैधता प्रदान गर्नु पर्ने मागसहितको सार्वजनिक महत्वको प्रस्ताव दर्ता गरेका थिए । त्यसपछि गाँजा खेतीलाई वैधता प्रदान गर्नु पर्ने बहस सतहमा आएको हो ।

सोही बहसको क्रममा सांसद तामाङ्गले निजी विधेयक दर्ता गरी गाँजा खेतीलाई वैध बनाउने कानून बनाउन माग गरेका हुन् ।

२०४६ यता संसदमा दर्ता भएका निजी विधेयक मध्ये तीनवटा मात्रै पारित भएका छन्।