राइड शेयरिङ एप ‘जाउँ गुरु’ सार्वजनिक, बाईकसँगै मिनी ट्रक र पानी ट्याङ्कर पनि मगाउन सकिने

काठमाण्डौंः नयाँ राइड शेयरिङ प्लेटफर्म जाउँ गुरू सार्वजनिक भएको छ । आईतबार काठमाडौंको होटल र्‍याडिसनमा आयोजित एक कार्यक्रममा  ‘जाउँ गुरु’ को औपचारिक उद्घाटन गरिएको हो ।

कम्पनी तीन युवा इन्द्रहाङ लिङ्देन, खुसी लिम्बु र दिवाकर अर्यालले सामूहिक लगानी गरेका छन् । जाउँ गुरूले दैनिक यात्रालाई सहज बनाउने कम्पनीका अध्यक्ष इन्द्रहाङ लिङ्देनले जानकारी दिए ।

अहिले काठमाडौँ उपत्यकामा मात्र सेवा उपलब्ध भएको र आगामी दिनमा मोफसलमा पनि विस्तार गरिने लिङ्देनको भनाइ छ ।

जाउँ गुरु एपमा लोकेसन शेयर, जीपीएस ट्रयाकिङ, भुक्तानीका लागि खल्ती लगायतका अन्य अनलाइन पेमेन्ट सिस्टमबाट पैसा तिर्न सकिने र २४ सै घण्टा कल सेन्टर सेवा लगायतका सुविधाहरु रहेका छन् ।

मोटरसाइकल र ट्याक्सी राइडर यस संस्था एपसँग आबद्ध हुँदा र यात्रु चढाउँदा पनि कुनै शुल्क नलाग्नु, चालकका लागि राइडरले सजिलै दर्ता गर्न सकिने, राइडर र यात्रुका लागि बीमा, राइडर वा अरु जो कोहीले रिफर गरेबापत कमिसन पाउने व्यवस्था, आपत्कालीन सुरक्षाका लागि नेपाल प्रहरीको १०० वा आकस्मिक सम्पर्क व्यक्तिसम्म सूचना दिन एसओएस (सेभ आवर सोल) सेवा पनि राखिएको छ ।

नेपालमा प्रयोगमा रहेका राइड सेयरिङ एपहरुले मोटरसाइकल र ट्याक्सीको मात्र सुविधा दिँदै आएकामा जाउँ गुरुले भने त्यसका अलावा बाइक डेलिभरी, मिनी ट्रक, पानी ट्याङ्कर र जिप भाडामा लिन सहजीकरण सेवा उपलब्ध गराउने छ ।

यससँगै हाललाई काठमाडौंमा बसोबास गर्नेहरूलाई कोठा सार्नका लागि मिनी ट्रक, बाइकको डेलिभरी, खानेपानीको आपूर्ति र लामो दुरीका लागि जिप भाडामा लिन सकिने कम्पनीले जनाएको छ । आईसिटीसमाचार