सीमा सुरक्षा व्यवस्थापन गर्नका लागि पाँच सय स्थानमा बिओपी राख्ने लक्ष्य : गृहमन्त्री

काठमाडौं । सीमा सुरक्षा व्यवस्थापन गर्नका लागि पाँच सय स्थानमा बिओपी राख्ने लक्ष्य राखिएको गृहमन्त्री रामबहादुर थापाले बताएका छन् ।

यसअन्तर्गत पहिलो चरणमा दुई सय २१ वटा बोर्डर आउट पोस्ट स्थापना कार्य अघि बढिरहेको उनले सदनलाई जानकारी दिएका छन।

मंगलबारको प्रतिनिधिसभा बैठकमा उनले अहिलेसम्म दार्चुलाको छ्याङरू र हुम्लाको हिल्सासमेत गरी एक सय २९ स्थानमा बोर्डर आउट पोस्टको स्थापना भइसकेको जानकारी दिएका छन ।

उनले भने, ‘आगामी आर्थिक वर्षमा ५९ वटा बोर्डर आउट पोस्टको स्थायी भौतिक संरचना निर्माण गर्न बजेट विनियोजन गरिएको छ ।’

हाल कोरोनाको प्रवेश रोकथामका लागि १२ सय १३ स्थानमा बिओपी विस्तार गरिएकोसमेत उनले बताएका छन ।

समाजमा हुने हत्या, हिंसा, चोरी, तस्करी, ठगी, अपहरण, बलात्कार, जातीय वा महिला हिंसाजस्ता आपराधिक कार्यप्रति शून्य सहनशीलताको नीति अवलम्बन गरी दोषीलाई कानुनबमोजिम कारबाही गर्न गृह प्रशासन प्रतिबद्ध रहेको उनको भनाइ थियो ।

सामाजिक अपराधमा संलग्न जोकोहीलाई पनि कानुनबमोजिम विनापूर्वाग्रह र निष्पक्ष रूपमा कारबाहीमा ल्याउन गृह मन्त्रालयमातहतका पदाधिकारीहरूलाई निर्देशनसमेत दिएको उनले बताएका छन ।

थापाले भने, ‘कहीँ कतैबाट राजनीतिक वा आर्थिक प्रभावमा परी कर्तव्यपालनामा कहीँ कतै कमजोरी भएको पाइएमा कानुनबमोजिम कारबाही गरिनेछ ।’